السيرك

لو دخلت أي سيرك في الدنيا هتلاقي إيه
هي هي نفس الحاجات
تعالوا كده نشوف سوا

الحاجات الأساسية نوعين

حيوانات و بشر

الحيوانات بقى حتلاقيها أصناف

قرود
و فيلة
و اسود و نمور
و خيول و حمير
و كلاب
و تعابين

نيجي بقى للبشر
بنو ابينا آدم و أمنا حواء يعني

ليهم صنفيين أساسيين

النوع الأولاني هما الشغالين في السيرك
و النوع التاني المتفرجين

الشغالين في السيرك أنواع و أشكال

واحد بيقول قرب قرب و شوف يا جدع
واحد بيقطع التذاكر
واحد واقف بودي جارد لأي خناقة أو أي واحد ليه شوق في أي حاجة

بلياتشو داهن وشه بويه و راسم ابتسامة بالألوان عشان يبان انه بيضحك حتى لو مكشر

بهلوان بيمشي على الحبل رايح جاي و شادد عيون الناس
لاعب ترابيز بينط في الهوا و يخلي الناس تصرخ مع كل نطة
اتنين بيطلعوا يضربو ا بعض ويهزأوا بعض قدام الناس عشان يضحكوهم

مروض وحوش فاكر إنه خلاص ما دام ماسك الكرباج يبقى أقوى من الاسود و النمور

ساحر بيطلع حمام و مناديل ملونة من الطاقية بتاعته
و جنبه بنت حلوة لابسة مايوه و ما بتعملش أي حاجة غير انها تتدلع و تبتسم
أو ساعات يدخلها في صندوق و ينشرها بمنشار و هي بتضحك برضه
وممكن تلاقي بنت تانية بتلعب مع التعابين

واحد عضلات بيشيل حديد و بالمرة كمان يشيل البلياتشو و البنت الحلوة

واحد بيبيع جيلاتي و حاجة ساقعة و شيبس
واحد تاني بيبيع بالونات و زمامير و لعب للأطفال

فرقة المزيكا و الطبل اللي عاملة دوشة عمال على بطال
و كل شوية الراجل اللي ماسك الطبلة يعمل صوت عالي قوي
قال يعني عشان تحسس الناس بالخطرالداهم اللي بيحصل

واحد بيكنس السيرك و يرشه بعد الناس ما بتمشي
واحد في آخر الليلة بيلم الايراد و يحطه في جيبه

و واحد مش موجود في وسط الدوشة دي خالص ... هو صاحب السيرك

الناس برضه أنواع واشكال

ستات و رجاله و أطفال
ناس قاعدة تتفرج على اللي بيحصل و بس
كل شغلتها إنها تتفرج
منهم اللي خايف و منهم اللي مبسوط و منهم اللي بيسقف

ممكن تلاقي واحد داخل يعاكس في البنات و يتلزق فيهم و مالوش دعوة خالص باللي بيحصل
و أكيد هاتلاقي نشالين
و ممكن النشالين دول يطلعوا تبع إدارة السيرك كمان

عايزين تعرفوا أنا شايف بلدنا ازاي

لو سمحتوا إقروها من الأول

مش باقول لكو عبيط