morsi6670

لو انت عندك خادم أو ساعي أو موظف في شركتك و طلبت منه يروح مشوار مهم في شغل معين و قلت له يركب تاكسي رايح و تاكسي جاي و إديته أجرة التاكسي ذهاب و عودة نزل هو بسرعة و راح و رجع بالأتوبيس و لا حتى راح و رجع جري على رجليه المهم إنه أدى المهمة المطلوبة منه كما ينبغي عشرة على عشرة هل يبقى من حقه باقي الفلوس اللي هي أجرة التاكسي ماشي هل من المفروض إنه يقول لك إنه راح و رجع بالأتوبيس و يرجع لك باقي أجرة التاكسي اللي وفرها و لا يضرب الباقي في جيبه و يقول لك إنه راح بتاكسي و رجع بتاكسي ماشي انت بقى صاحب العمل أو المدير بتاعه لو حبيت تبعت الموظف ده نفس المشوار تاني هاتديله برضه تمن أجرة التاكسي و لا هاتقول له ما انت رحت بالأتوبيس قبل كده يبقى تاخد أجرة الأتوبيس بس و يكون ده تمن إنه طلع صادق معاك يا حلو ماشي طب لو حبيت تبعت أي موظف أو عامل تاني في نفس المشوار ها تديله برضه أجرة التاكسي رايح جاي و لا تقول له زميلك قبل كده راح بالأتوبيس و لا على رجليه يعني كده الموظف الأولاني قفلها على نفسه و قفلها على غيره لأنه طلع معاك صادق يا معلمي حلو قوي طب لو المشوار ده ها يطول و لازم الموظف ده يتغدى و سيادتك...

بعد ما قررت اقول لكم كل حاجة عني عشان تعرفوا ايه حكاية الثور اللي قلع غماه و شاف اللي حواليه و بما إن انتوا اللي بتقولوا اني باكتب بأسلوب حلو يبقى لازم أدوشكوا بقى شوية أ عتقد ان أي إنسان على وجه الأرض هو خليط من حاجات كتير يعني مش حاجة واحدة مصمتة مكونة من عنصر واحد بالضبط زي المبنى أو البيت متكون من وحدات مختلفة و متباينة في ذات الوقت طوب و زلط و رمل و أسمنت و خشب و حديد تسليح أسلاك و ابواب و شبابيك و كوالين و مفاتيح و أكيد برضه ها تلاقي مواسير مياه نضيفة .. و مواسير صرف صحي كمان المباني دي بقى هاتلاقيها مختلفة عن بعضها جدا فيه مباني شاهقة ، وفيه مباني دور واحد أو أرضي فيه مباني جميلة ، و فيه عشوائيات قبيحة فيه مباني زي الهرم تقعد ألوف السنين و مباني زي عمارة الحاجة كاملة اللي وقعت في الزلزال فيه مباني بالرخام أو مدهونة زيت أو على المحارة أو على الطوب الأحمر فيه مباني حلوة قوي من بره و من جوه ضيقة و تقرف و تخنق و تبقى عايز تخرج منها بأي طريقة و لو حتى نطيت من الشباك و فيه مباني متواضعة قوي من الخارج و من جوه جميلة و مريحة جداو تبقى مش عايز تخرج منها أبدا ممكن تلاقي جناين و ممكن تلاق...

عبيط العبيط كلمة عربية فصحى في المعجم الوجيز يقال رجل عبيط يعني أبله غير ناضج و العباطة هي البله و عدم النضج و في مختار الصحاح يقال مات فلان عَبْطَةً أي صحيحا شابا و العَبِيطُ من الدم الخالص الطري طب تعالوا بقى نشوف كلمة عبيط دي دلوقت يعني إيه لما تبقى كريم لما تبقى أمين لما تبقى مؤدب لما يبقى صوتك واطي لما تكون مش منافق و لا ماسح جوخ لما تكون مش كداب و لا بتنقل كلام لو حد شتمك و ما ردتش عليه حقاني و تقول كلمة الحق و لو على نفسك أو أقرب الناس ليك لو زميلك في الشغل خلاك تخلص له شغله و هو قاعد مش بيعمل حاجة و بعدين يقول أنا اللي اشتغلت الشغل كله لو رفضت تقول في التليفون انه مش موجود زي ما بيقول لك لو قلت لزميلك القريب قوي منك سر و لقيت تاني يوم الناس كلها عارفاه لما ترفض انك تعمل اللي بيعملوه كل زمايلك في الشغل و تقول ده غلط و حرام لما يقولوا لك اربط الحمار مطرح ما يقول لك صاحبه و انت تقول لأ - لازم الصح هو اللي يتعمل لما تدور على كل قرش بتكسبة ده حلال و لا حرام لما تظن في الناس كلهم خير يعني أي واحد يقول لك أي حاجة تصدقه و تقول طب و هو ها يكدب عليا ليه ؟؟ لما الراجل يبص لكل البنات و الس...

احمد ابني قال لي : مش عارف ابقى زيك يا بابا مش عارف أحب البلد دي زي ما أنت بتحبها كده حاولت و ما عرفتش و مش عارف انت بتحبها كده ليه قلت له عادي أنت لسه صغيرلسة ما شفتش حاجات كتير في مصر لسة ما جربتش الغربة قال لي : أنت عارف لما قعدت في إسكندرية أسبوع مع أصحابي وحشتوني جدا وحشتني كل حتة في الشقة حتى وحشتني دوشة هاجر و حشتني القاهرة كلها قلت له : أسبوع في إسكندرية ؟؟ لأ يا حلو لما الطيارة تطلع بيك برة مصر لما تنزل في مطار تاني خالص في بلد تانية خالص تقابل ناس تانية خالص ممكن حب الاستطلاع و الزهق من مصر يخلوك فرحان شوية بس هما شهر.. اتنين .. تلاتة بالكتير و تلاقي نفسك تعبت نفسك تنزل مصر و لو خميس و جمعة و ترجع للغربة تاني و يبدأ بقى يا حلو العد التنازلي في حالتك النفسية لغاية ما توصل لدرجة الصفر نقطة الانطلاق نقطة العودة فيه ناس بتستحمل سنين وناس ما تقدرش تستحمل شهور حاجة غريبة فينا يا مصريين بالرغم من ان كل واحد فينا في الغربة بيمثل قصة نجاح إلا إننا كلنا بنبقى هانموت و نرجع مصر تاني هاقول لكواعلى حاجة غريبة قوي ليلة شفت تفاصيلها بعيوني لما رجعت من السعودية انا و مراتي و ولادي راجع مديون...

أنا راجل متجوز من 23 سنة مراتي تبقى بنت عمي اتجوزتها و هي في تانية كلية البنات أخدت ليسانس تاريخ و دبلوم تربوي بفضل الله و بمساعدتي و تشجيعي ليها و عمرها ما اشتغلت و لا فكرت تشتغل الحمد لله عندي خمس عيال ولادي كلهم في التعليم و كلهم أزهريين الكبير في ليسانس أصول الدين و الصغيرة في الحضانة معنى ده إيه ؟؟ معناه ببساطة إني محافظ على بيتي و ولادي و الحمد لله لمدة تلاتة و عشرين سنة الحمد لله عمري ما اشتكيت الحمد لله عمري ما ونيت الحمد لله عمري ما زهقت من المسئولية اترميت في البحر و أنا لسة مش باعرف أعوم عمري ما قلت غير يا رب و ربنا دايماً كان معايا كنت دايماً و على قد ما أقدر باشوف أي حاجة اقدر أسعد بيها مراتي و ولادي حافظت على بيتي و مراتي و ولادي عمري ما طلبت من مراتي انها تشتغل كنت دايما باقول لها ليكي عندي شغلانة حلوة انك تصلي و تدعي لي بعد صلاتك وتقولي يا رب الرزق اللي كان هايجيلي لو اشتغلت ارزق جوزي بيه لأنه هايوصل لي أنا و ولادي عن طريقه عمر ولادي و لا مراتي ما اشتكوا مني لحد طول عمري باحاول أسعدهم كل الناس بتقول دايما اني مدلعهم حتى حمايا و حماتي أكيد لازم أدلعهم مش مراتي و عيالي د...