خيل و بغال و حمير

و الخيل و البغال و الحمير لتركبوها و زينة و يخلق مالا تعلمون

دي الدواب اللي ذكرها ربنا في القرآن عشان ابن آدم يركبها أو يمتلكها لمجرد الزينة


و زي ما فيه حصان بيجر عربية نزح مجاري و صرف صحي
فيه حصان تاني بيجر كارتة أو حنطور عشان الناس تتفسح
و حصان بيلعبوا بيه في ملاعب كرة البولو
و حصان بيدفعوا فيه ملايين لمجرد إنه يجري في سباق
و حصان بيدفعوا فيه ملايين أكتر عشان بس الناس تتفرج عليه
و تلاقي له شهادة ميلاد و شجرة عيلة كمان


و زي ما فيه بغال بتجر حجر معصرة في سرجة لغاية ما تطلع روحها
بغال تانية بتشيل أحمال تسافر بيها بلاد بعيدة
و بغال كانت بتجر مدافع في الجيش الأمريكي
و بغال بتجر عربيات فول و عربيات زبالة و عربيات فاكهة


و زي ما فيه حمار بيرعى في الغيط و عايش مأنتخ
حمار تاني أمه داعية عليه بيدبحوه
عشان يأكلوه للأسود في السيرك أو جنينة الحيوانات


المهم إن كلهم خيل
كلهم بغال
كلهم حمير

كلهم بأربع رجلين و ودان طويلة و ديل


الحمير و البغال صوتها اسمه نهيق
و الخيول صوتها اسمه صهيل


ماحدش سأل نفسه إيه رأي الحصان
تحب يا حصان أفندي تجر عربية و لا تلعب بولو و لا تجري في سبق
ماحدش خد رأي البغل أو الحمار قبل ما يربطه في عربية كارو و لا يركب على ضهره


حصان أو حمار بيجر عربية

ممكن يكون عليها طوب و دبش من هدم عمارة
ممكن يكون عليها عيال بتطبل و تهيص في العيد
ممكن يكون عليها قدرتين واحدة فول و التانية بليلة
ممكن يكون عليها بطيخ و خيار و كنتالوب

ياللا يا عم الحمار ورانا شغل
حاضر يا عم العربجي

***********************************************

الغريبة بقى
و لا مؤاخذة في اللفظ يعني

أنا شايف إن كلنا حمير مربوطين في عربية
لازم نكمل المشوار لآخره
لازم نعمل اللي عايزه العربجي
و لو ما عملناش ؟؟
مافيش غير الكرباج


الموظف
الطالب
المهندس
الطبيب
الأب رب الأسرة
الأم ست البيت
حتى رجل الأعمال


تصاعدياً كده من الغفير للوزير
كل الناس بقوا خيل و بغال و حمير


شي .... يمشي
يس .... يقف
و برضه مش عارف أكتب الكلمة اللي الخواجة كان عايز اسماعيل يس يكتبها له في الجواب

******************************************

طب الحمار ساعات ممكن يزرجن و يحرن و يرفض و يرفص
و خد لي بالك لو سمحت من النقطة اللي فوق الضاد و مش فوق الصاد
لكن ابن آدم اللي ربنا كرمه بالعقل ما يقدرش يرفض
ابن آدم ما يقدرش يزرجن و لا يحرن و لا يرفص
لازم يمشي زي ما الدنيا كلها عايزاه يمشي
كل الدنيا عربجيه .... مع إنه هو حصان واحد

***************************

و معلومة ع الماشي للي ما يعرفش
البغل هو حيوان ناتج من تزاوج حصان ذكر و حمارة أنثي
و مستحيل يحصل العكس
لأن الفرس لا يمكن تسمح للحمار إنه يتجوزها
و البغل حيوان عقيم تماماً
و مالوش أعضاء تناسليه أصلاً عشان يتزاوج


يعني حتى الفرس لا يمكن تخلي الحمار يتجوزها
يعني الفرسه ليها رأي و تقدر تقول أيوه أو لأ
و لا يمكن حد يقدر يخليها تعمل شئ هي مش عايزاه

شفتوا بقى إننا أقل من الدواب
و بنقول على نفسنا بني آدمين


إيه اللي أنا باكتبه ده ؟؟


حاااااااااااااااااااااااااااااا

رضا

فرق كبير بين الرضا و التسليم بالأمر الواقع

الرضا هو الاقتناع التام بشيء معين
إن ما يبقاش نفسك في حاجة تانية
و مش بتدور و لا عايز أصلاً تدور على حاجة تانية

يعني زي واحد كان جعان و أكل لغاية ما شبع
ولو حتى يكون أكل طعمية و عيش بلدي و جرجير
خلاص ما بيبقاش نفسه في أي أكل زيادة
و لا عايز ياكل و لا يقدر ياكل تاني
بطنه مليانة و عينه مليانة و مش عايز حاجة
و لو حتى جابوا له تورتة بلاك فورست من لابوار

ساعتها بعد الأكل بيقول الحمد لله بجد
الحمد لله طالعة من قلبه و مقتنع بيها تماما

يعني الرضا بيتحقق لما نوصل لأعلى مستوى في أي شئ
لكن المستوى الأقل مش بيحقق الرضا الحقيقي
و بتبقى دايما بتفكر في الأحسن أو الأعلى

يعني الرضا مش هو الموجود و خلاص
مهما كان قليل أو مش كويس
الرضا مش يعني الرضا بالقليل أو الكسور أو المهملات

***************************************************

لو عايزين تفهموها زي ما أنا فاهمها

اسمعوا النبي محمد عليه الصلاة و السلام و هو بيعلمنا نقول
رضيت بالله ربا و بالإسلام دينا و بمحمد نبياً و رسولاً
شوفوا معنى كلمة الرضا هنا يعني إيه

الله ربي
يعني مقتنع تماماً بالله سبحانه و تعالى كرب و إله
و مش بافكر أبداً إني أعبد رب تاني أحسن منه
و لا أقول ياريت ربي يكون كده
لأن مافيش أحسن من كده

الإسلام ديني
يعني مقتنع تماماً بالإسلام كدين
و مش بافكر أبداً في دين تاني أحسن منه
و لا أقول يا ريت الإسلام يكون كده
لأن مافيش أحسن من كده

محمد نبيي و رسولي
يعني مقتنع تماماً بمحمد نبي و رسول
و مش بافكر أبداً في نبي و لا رسول تاني أحسن منه
و باقول ياريت النبي محمد يكون كده
لأن مافيش أحسن من كده


و إقروا كلام الله و هو بيقول عن المؤمنين بعد ما دخلوا الجنة
رضي الله عنهم و رضوا عنه

يعني المؤمنين في الجنة ربنا راضي عنهم و مش مطلوب منهم شئ تاني
و هما كمان راضيين عن الله و مش طالبين شئ زيادة تاني
هو فيه حاجة تاني زيادة بعد دخول الجنة ؟؟

ده الرضا اللي أنا فاهمه
مش الموجود و خلاص
مهما كان قليل أو مش كويس

*************************************

و فيه كمان نقطة تانية

الرضا هو إنك ترضى بقضاء الله و قدره
انك ترضى باللي ما تقدرش تغيره أبداً
لكن لو حاجة تقدر تغيرها .. ده ما يبقاش رضا
ده يبقى تسليم أو استسلام

يعني ربنا خلقك ولد أو بنت
أبوك و أمك هما فلان و فلانة
انت مصري و اتولدت في مصر
انت مولود في الزمن ده – لا قبل كده و لا بعد كده
اتجوزت و ربنا رزقك بولد أو بنت أو حتى طفل مغولي
هنا لازم تقول أنا راضي
لأنك ما تقدرش تغير حاجة
ما تعرفش تغير حاجة
مستحيل أصلاً تغير أي حاجة من دول

*************************************

لكن التسليم بالأمر الواقع حاجة تانية

هو إن الواقع ممكن يتغير
لكن إنت مش قادر تغيره
أو مش عارف إزاي تغيره
أو حتى مش عايز تغيره
و حاطط لسانك في بقك و ساكت
بس نفسك كل حاجة تتغير

سلبية تامة يعني
عجز عن فعل أي شئ

مش قادر
أو مش عارف
أو مش عايز

و لو حد سألك أخبارك إيه يا كابتن
تقول له إيه بقي يا محترم ساعتها ؟؟
رضا ... الحمد لله

و تلاقي كلمة الحمد لله دي طالعة مدخنة من صدرك
و انت رافض كل الواقع اللي انت عايش فيه
و شكلك عايز تضرب اللي سألك السؤال الغبي ده
ما إنت شايف العيشة يا أعمى العين و القلب

ده بقى اللي بيقولوا عليه إن الواحد يرضى بقليله عشان يعيش
و احمد ربنا انك عايش على رأي سعد الصغير
إحنا أحسن من غيرنا يا عم الحاج

*************

ماهو لو واحد جاله مرض .. أي مرض لو حتى زكام
و عنده القدرة و معاه فلوس يتعالج و الدكتور في آخر الشارع
و ماراحش لأي دكتور و لا أخد أي علاج
يبقى كده و لا مؤاخذة ما ينفعش يقول رضا
انت اللي عملت في نفسك كده

لكن لو بعد ما لف على الدكاترة اللي قالوا له مافيش علاج
يبقى كده لازم يقول رضا
و أنا عملت اللي في مقدرتي
وما أقدرش أعمل حاجة تاني
و يقول دي إرادة ربنا
و ساعتها فعلا ما يبقاش عليه أي لوم


*************

لو واحد موظف حكومة و لا قطاع عام
و بياخد مرتب ما يقدرش يعيش قطة لمدة أسبوع
و قاعد على المكتب طول النهار مش بيعمل حاجة
ما ينفعش ساعتها يقول رضا
أكيد ها تلاقيه مش قادر – مش عارف – مش عايز

لكن لو قعد يدور و يسعى
و يقدم في كذا شركة و يدور على كذا سفرية
و يحاول يحسن مستواه بدراسة او دورات أو تدريب
و يلاقي أي حل للكابوس اللي هو فيه
و لقى برضه باب الرزق مش راضي يفتح
يبقى كده مش عليه أي لوم و يقدر يقول رضا
أنا راضي يارب

**************

حلو لغاية كده ؟؟
طب تعالوا نكبر الموضوع شويتين

***************

ليه سيدنا موسى ما قالش رضا
أدينا عايشين في مصر جنب النيل و الزرع
فرعون بيعذبنا أي نعم بس عايشين
حتى اللي بيتعذبوا دول يا إما تكفير ذنوب يا إما بياخدوا ثواب
و لو ماتوا من التعذيب ها يروحوا الجنة
حلو قوي كده .. عايزين ايه تاني
إيه لزومها البهدلة و نسيب بيوتنا و أرضنا
و نخلي فرعون يحطنا في دماغه كمان


ليه سيدنا المسيح ما قالش رضا
آدي احنا بنعبد ربنا بعيد عن بيلاطس و الرومان و اليهود
و ربنا على المفتري و ينتقم منهم أجمعين ... قادر على كل شئ
ليه يدخل الهيكل و يقلب الموائد و يهاجم الفريسيين و الكتبة
ما كان قال لهم كلمتين و نصحهم و خلاص
و يدعي للفريسيين و الكتبة دول ربنا يهديهم
و لا حتى يدعي عليهم ربنا ياخدهم


ليه النبي محمد صلى الله عليه و سلم و الصحابة ما قالوش رضا
ليه ما قالوش نستحمل عذاب الكفار في مكة و لو متنا هانروح الجنة
إيه اللي يخلينا نسيب بلدنا و نهاجر
ما احنا عايشين في بيوتنا و بين أهلنا و جنب الكعبة كمان
و بنعبد ربنا في السر لغاية ما الكفار دول يغوروا في داهية أو ربنا يهديهم
و زي المثل ما بيقول
اصبر على جار السوء .. يرحل أو تجيله داهية
مالناش دعوة بحاجة تانية بقى


أكيد هاتقولوا دول أنبياء و ده وحي من الله و لازم تنفيذه
طب و هو احنا بقى لازم نتغير بوحي من السما
ما ينفعش نغير نفسنا بنفسنا يعني ؟؟
و لا هما الأنبياء كانوا بيعلمونا نغير حالنا و نلاقي حلول لمشاكلنا
كانوا بيعلمونا طرق الحل المختلفة و طرق تغيير الواقع


طب تعالوا نبعد عن سير الأنبياء شوية


ليه واحد زي سليمان الحلبي ما قالش رضا
يا عم أنا راجل سوري جاي اتعلم في الأزهر
آخد الشهادة العالمية و أرجع بلدي عالم أزهري قد الدنيا
أنا إيه اللي يخليني أقتل كليبر و يقعدوني على الخازوق
و المصريين أصحاب البلد واقفين يتفرجوا زي العادة


ليه مصطفى كامل ما قالش رضا
و منهم لله اللي شنقوا الفلاحين في دنشواي
ناس مفترية ... و ربنا على المفتري
على العموم الفلاحين دول شهداء
و ربنا يستر علينا و على باقي الفلاحين


ليه سعد زغلول ما قالش رضا
آدي احنا بقى عندنا دستور محترم
و الوفد خد الحكومة
عايز إيه تاني بقى يا عم سعد


ليه طلعت حرب ما قالش رضا
أنا مالي يا عم و مال البنوك و الاقتصاد و القطن و السيما
خليني في حالي أربي عيالي بالقرشين اللي معايا


ليه جمال عبد الناصر ما قالش رضا
عملت لك ثورة يا عم و بقيت رئيس جمهورية
كده نايس آخر حاجة يا معلم
هو يعني لازم سد عالي و لا تأميم قناة و عدم انحياز
و تحرير الجزائر و اليمن و الدوشة دي كلها


ليه أم كلثوم ما قالتش رضا
أديني باروح موالد في المنصورة و وجه بحري
و بانام كل يوم متعشية أنا و أبويا و أمي و اخواتي


ليه السنباطي و لا محمد عبد الوهاب و لا القصبجي ما قالوش رضا
و إيه لزوم المقامات الجديدة و الصعبة و القصايد و البلاوي دي كلها
ماحنا شغالين حلو ع الأفراح و الليالي الملاح و خلاص


ليه واحد زي أحمد زويل ما قالش رضا
كان زمانه دلوقت نائب رئيس جامعة لشئون التعليم و الطلاب
و لا رائد عشيرة جوالة قد الدنيا في كلية العلوم
و ممكن كمان كانوا عملوه وزير
وزير الدولة لمكافحة الناموس .. و إيزالو للجميع

*******************************

طب هما ليه في بلاد بره مش بيقولوا رضا
ليه دايما بيدوروا على الأحسن لغاية ما يعملوه
و ليه قدامهم بدائل ممكن لو ده مش عاجبهم يعملوا التاني

ليه في اليابان ما قالوش رضا
طالعين مفيصين من الحرب و قنبلتين في هيروشيما و ناجازاكي
و كل يوم البلد فيها زلازل و تسونامي
و هي كلها عبارة عن جزيرة بترقص في وسط البحر
خلينا في حالنا يا عم نقعد نعيط على حالنا براحتنا
ياباني في غير ملكك

ليه الألمان ماقالوش رضا
برلين بقت فتافيت بعد الحرب
ناكل زباله بقى و نسيب الجثث تعفن في الشوارع
ألمانيا دي لا يمكن ترجع زي الأول أبداً
إنت بتحلم يا خال ؟؟

طب ليه حتى اليهود ما قالوش رضا
أدينا واكلين شاربين نايمين واخدين جنسيات العالم كله
و اقتصاد الكرة الأرضية كله في جيوبنا
إيه لزوم اننا نجمع بعض و نعمل دولة و وطن قومي لليهود
و نحارب و نعمل مؤتمرات من 100 سنة
و نخطط لأحفادنا و أحفاد أحفادنا

*******************

لو كل الناس من أيام آدم قالت رضا زي ما إحنا بنقولها
و لا كان حصل أي تقدم في أي حاجة في تاريخ البشرية

كان زماننا بنخبط الزلط في بعضه عشان نولع نار
و كان زماني دلوقت ماسك الرمح بتاعي و رايح أصطاد عشان أغدي العيال
و لا على الأقل مستني الفرخة تبيض عشان الواد ابني ينزل يحلق

فيه آية في القرآن لازم نقراها كويس و نفهمها
لأننا كده فعلاً ماشيين في سكة غلط

*******************

اللذين توفاهم الملائكة ظالمي أنفسهم قالوا فيم كنتم
قالوا كنا مستضعفين في الأرض
قالوا ألم تكن أرض الله واسعة فتهاجروا فيها

*******************

يعني حكاية هو إحنا فيه ايه في ايدينا نعمله دي مش تمام
إحنا مالنا يا عم أدينا عايشين و ربنا على المفتري
يا عم اربط الحمار مطرح ما يقول لك صاحبه
يا عم ارضى بقليلك عشان تعيش
انت ها تعمل لنا فيها عرابي و لا عبد الناصر ؟؟

*******************

هو فيه إيه ؟؟
ايه اللي أنا باكتبه ده ؟؟؟

لأ لأ أبداً مش قصدي حاجة خالص

كده رضا قوي يا سعادة البيه
لأ بلاش كده
طب النضارة لو سمحت
أي أي أي
رضااااااااااااااااااااااااااااا

الشجرة

طبعا كل بني آدم و حواء عارفين القصة

قصة بداية الخلق
لما ماكانش فيه بشر غيراتنين و بس

آدم و حواء

و عارفين قصة الشجرة اللي ربنا قال لسيدنا آدم ما يقربش منها
و لا ياكل من ثمرها
قدامك كل شجر الجنة و ثمارها يا آدم انت و حواء
لكن الشجرة دي لأ

سيبك بقى من إن الشجرة دي هي شجرة معرفة الخير و الشر
و لا شجرة الخلد و ملك لا يبلى
ولا شجرة التفاح اللي وقفت في زور سيدنا آدم و لسة واقفة في زور أولاده الذكور لغاية دلوقت
إياكش حتى تكون شجرة مكرونة اسباجيتي بصلصة البولونيز
المهم إن دي حكاية محفورة في ذاكرة البشرية كلها

****************************************************************

لكن تعالوا بقى نسأل شوية أسئلة أسئلة مالهاش أي معني
لكن فيها كل المعاني

هي الشجرة المحرمة دي كان شكلها إيه ؟؟
كانت عاملة إزاي يعني ؟؟
ماهو مش معقول تكون شجرة عادية
لا يمكن تكون هي هي نفس الشجر التاني اللي مالي الجنة

يعني بالعقل كدة و بالمنطق و واحدة واحدة
لازم تكون مميزة عن باقي شجر الجنة
و ثمرها غير كل الثمر اللي بتطرحه أشجار الجنة
لأن ربنا بيقول و لا تقربا هذه الشجرة
يعني حاجة مميزة معروفة واضحة
يقدر آدم و حواء يميزوها
شايفينها بعينيهم و عارفينها
و ربنا قال لهم عليها و يقدروا يعرفوها من بين الشجر

لأنهم لو ما يقدروش يميزوها يبقى ممكن ياكلوا منها و هما مش واخذين بالهم

طب هي كانت شجرة واحدة في كل الجنة
و لا نوعية شجر بحالها ممنوع الأكل منها

ممكن تكون شجرة واحدة في مكان محدد بعيد عن باقي الشجرعشان تبقى مميزة

و ممكن تكون شجر كتير من نوعية معينة و متوزعة بين شجر الجنة

بس في نفس الوقت واضحة في وسط الشجر
و بتقول أنا أهو

المهم إنها مميزة

و أكيد أكيد أكيد بقى إنها كانت جميلة
و يمكن أجمل من كل شجر الجنة

و أكيد برضه إنها كانت ملفتة للنظر
تخطف عيون آدم وحواء
أكيد كانت ثمارها مغرية للأكل
و شكل ثمارها مختلف
و أحلى من باقي الثمارالتانية

ليه بقى ؟؟

لسبب بسيط جدا

إنها لو كانت زي باقي الشجر
نفس الشكل و نفس اللون و نفس الثمر يعني
يبقى الشيطان هايغري آدم و حواء إزاي ؟؟

مش ها يبقى لكلام إبليس أي معني عند آدم

عايزني آكل من الشجرة دي ليه يا سي إبليس ؟؟
ما هي زي باقي الشجر أهي

و إبليس ساعتها كان لسة عبيط

لسة ما اتعلمش من الناس تكنولوجيا المعصيه
كان كل همه إنه يخرج آدم من الجنه و بس
و هي معصية واحدة فقط لا غير

لا كان فيه خمر و لا زنا و لا ربا و لا تزوير انتخابات

**********

حلو كده ؟؟؟؟ خليكو بقى معايا

**********

لنفرض جدلا
و بقولها تاني لنفرض جدلا
مجرد جدل أو سفسطة

إن الشجرة دي حلال
أكلها حلال
و القعدة في ظلها حلال
و ثمرها حلال في حلال

مافيش أي شبهة أو كراهة أو حرام

سيدنا آدم ممكن ياكل منها من غير ما يرتكب أي ذنب

مد إيدك يا آدم و كل من الشجرة الحلوة دي لغاية ما تشبع
من غير وسوسة إبليس و من غير الوقوع في المعصية أو الخطية

طب ايه اللي يخليه ساعتها ما ياكلش منها ؟؟

دي أحلى شجرة في الجنة

حتى لو كانت حلاوتها في عيون آدم بس
ده أنا لازم أخلص عليها الأول كمان

لا عيب و لا حرام ما آكلش و أملا بطني ليه ؟

كل يا عم لغاية ما تشبع ألف هنا و شفا

ما ياكلش ليه لو حلال؟؟

هل كده هو ها يرضي ربنا
طب ربنا بيقول لك ممكن تاكل منها .. دي حلال

و لا هو آدم عايز يروض نفسه و يعمل فيها متصوف أو زاهد

طب لو طلب منه المجتمع إنه ما ياكلش منها – يعمل إيه ؟؟

و المجتمع كله في الوقت ده كان أمنا حواء

يعني لو أمنا حواء قالت له ماتاكلش يا راجلي من الشجرة دي هايقول لها إيه ؟؟

يا ترى ها يقول لها : بس كده يا روحي
مش هاكل منها بس عشان خاطر عيونك يا قمر

و لا هايقول لها ما آكلش ليه ده الأكل منها لا عيب و لا حرام

طب يرضي أمنا حواء و يقول لها أنا ما أكلتش من الشجرة و من وراها ياكل و يتمتع و يعمل اللي نفسه فيه
و لا يقعد كده مع مراته و يقول لها اقنعيني اني ما أكلش منها
قولي لي ما آكلش منها ليه

ولا ها تقول له ما الشجر كتير قدامك أهو

هو لازم الشجرة دي يعني ؟؟

دانت طماع و طفس قوي يا آدم

طب نفرض إن آدم سمع كلام حواء و ما أكلش من الشجرة

مش من حقه أنه يبص للشجرة

مش من حقه يقول ياريت أقدر آكل منها

مش من حقه حتى إنه يحلم إنه بياكل منها

و لا حواء كمان هاتقول له ما تفكرش مجرد تفكير فيها

مجرد إنك تفكر و تحلم و تقول نفسي فيها ده غلط

مين اللي قال إنه غلط ؟؟

هو أنا كمان هاحلم على مزاج المجتمع

و المجتمع زي ما قلنا يومها هو حواء بس

طب جزاؤه عند ربنا إيه
إنت اللي حرمت نفسك يا آدم
حرمت نفسك من حاجة حلال
حرمت نفسك بس عشان ترضي باقي الناس
و باقي الناس يومها هي حواء زي ما قلنا

****************************************************************

طب تعالوا لإشكالية تانية

و الإشكالية دي نبهني ليها أصدقاء أعزاء

لو الشجرة دي من حقها تمنح و تمنع

الشجرة هي اللي تقول مين اللي ياكل مني
أنا حرة أعطي ثمري لمن أريد و ليس لمن يريد
يا ترى الشجرة ها تقول لآدم تعالى مد إيدك أقطف و كل و إشبع
و لا هاتقول له إبعد عني عشان حواء ما تزعلش منك
أنساني يا آدم و اسمع كلام مراتك حواء
ربنا يهديك يا آدم أرجوك إبعد عني

****************************************************************

يعني هو لازم آدم يسمع الكلام
كلام حواء
و كلام الشجرة

مش من حق آدم يعمل اللي عايزه ليه بقى ؟؟

هو كده عاجبك و لا مش عاجبك يا عم آدم

إيه اللي أنا باكتبه ده ؟؟

من منازلهم

تخيل وزير صحة مش خريج طب
و عمره ما مسك سماعة وكشف على واحد عيان

تخيل وزير إسكان مش خريج هندسة
و لا عمره اشتغل مهندس في أي مجال

تخيل وزير عدل مش خريج حقوق
و لا عمره حضر تحقيق
و لا اشتغل لا في النيابة و لا في القضاء
و لا حتى محامي

تخيل شيخ أزهر مش خريج أي كليه أزهرية
و لا حتى حافظ ربع القرآن

***********************************************
الغريبة بقى

إن وزير التعليم في بلدنا
لازم تتوافر فيه الشروط الأساسية التالية

**********
ألا يكون خريج أي كلية من كليات التربية
و لا يكون أحد أعضاء هيئة تدريس بأي كلية تربية

ألا يكون قد مارس التدريس بأي نوع من المدارس
لا إبتدائية و لا إعدادية و لا ثانوية
لا أزهرية و لا تجارية و لا صناعية

ألا يكون أحد من العاملين بوزارة التعليم
حتى لو كان من الموجهين أو النظار أو مديري المدارس

ألا يكون قد أمسك طباشيرة في حياته و كتب بيها على السبورة
سواء كان هذا الطباشير أبيضاً أو أبيضٌ أو أبيضٍ أو ألوان

ألا يكون قد حضر طابور مدرسة
و لا شم تراب الحوش و العيال طالعة الفصول
إلا و هو صغير في المدرسة طبعاً

ألا يكون عضواً بنقابة المعلمين
هما ها يدوله العضوية بعد ما يبقى وزير التعليم

**********************

يعني من الآخر
يشترط في وزير التعليم بالذات
أن يهبط على الوزارة بالباراشوت

مرة محامي
مرة طبيب
مرة مهندس الكترونيات

أي نعم كلهم واخدين دكتوراه
و أساتذة جامعات محترمة
و بيدرسوا لطلبة الجامعة

لكن أنا باتكلم عن وزير التعليم
مش وزير التعليم العالي

وزير المدارس يعني
أو المعارف
زي ماكانوا بيقولوا عليها زمان

**************
المهم يعني إنه مش خريج تربية
و لا درّس في المدارس قبل كده
و لا درس طرق تدريس
و لا علم نفس تربوي للأطفال
و لا عارف إيه مشاكل المدرسين بالظبط

لما يبقى وزير يبقى مدير مكتبه و السكرتارية يقولوا له

و إذا وسد الأمر لغير أهله .. فانتظر الساعة

**************

إديها جودة تعليم ع الآخر
طب العيال بتجيب مية في المية
هو انتوا كده ناقصين جودة تعليم
ده ولا في ألمانيا حد بيجيب هاندرد بيرسنت

طب ما تيجوا نسأل كده و نطقس
على العيال اللي جابت المجاميع الفظيعة دي من سنتين تلاتة

هما فين دلوقت ؟؟
و اللي دخل فيهم طب و لا هندزة
برضه طلع فيها الأول ؟؟

و لا خدها من قصيرها و حول تجارة بعد ما دبلر سنتين

طيب ما تشوفوا النظام التعليمي في اليابان ولا في ألمانيا
و لا في كوريا حتى ماشي ازاي
مافيش مانع نقلدهم يعني .. و لا إيه ؟؟

**********
انت بتقول ايه يا سفيه ؟؟

**********

إحنا الفراعنة اللي علمنا الدنيا

شوف آثار أجيال ملوا الدنيا حضارة و ابتكار
علموا قلب الحجر يوصف معارك الانتصار
علموه يبقى دليل الدهر ليهم بالفخار
كان نهار الدنيا ماطلعش و هنا عز النهار

مرة واحد قبطان مركب كان يوناني
و كنت أنا في دمياط في مأمورية في الميناء

قال لي ما تحاولش أبدا تقنعني ان المصريين اللي موجودين دلوقت هما أحفاد الفراعنة اللي بنوا الأهرامات - أنا لا يمكن أصدقك


كنا زمان بنقول على الراجل العبيط إنه هندي
الهند هي أول دول العالم في انتاج و تصدير السوفت وير


أنا الهنديىىىىىىى
كريم العنصرييييييييييين


إيه اللي انا باكتبه ده ؟؟

تكريم الأنسان

جملة غريبة قوي
و غبية قوي

بجد جملة غبية قوي

جملة باقراها دايما على سيارات نقل الموتى
أو سيارات تحت الطلب زي ما مكتوب على نمرتها

سيارة تكريم الإنسان

هو الإنسان مالوش حق يتكرم و هو حي

هو لازم يموت عشان يتكرم


اسمع ربنا بيقول في القرآن إيه
الآية 70 من سورة الإسراء

و لقد كرمنا بني آدم و حملناهم في البر و البحر و رزقناهم من الطيبات و فضلناهم على كثير ممن خلقنا تفضيلا


أكيد لو قريت الآية ها تفهم إن التكريم اللي ربنا عمله لبني آدم هو تكريم في الدنيا

تكريم أحياء و ليس تكريم أموات

حملناهم في البر و البحر
رزقناهم من الطيبات
فضلناهم على كثير ممن خلقنا تفضيلا

أي نعم في كلمة بتتقال دايما على ألسنة الناس

ما اعرفش إن كانت حكمة و لا حديث
إكرام الميت دفنه

لكن تكريم الإنسان حاجة تانية

يعني مثلا لما ييجوا يعملوا عزاء للدكتور المسيري و يحضره ناس من كبار رجال الدولة ، الناس دول ما قالوش بم لما عسكري أمن مركزي ضرب المسيري

لو أنا هافضل عايش في الدنيا من غير تكريم
و لو التكريم مرتبط و له سبب واحد هو الموت
و هاركب نايم و ملفوف و مرتاح في عربية اسمها تكريم الانسان

يبقى فعلا اللهم أحيني إذا كانت الحياة خيرا لي
و توفني إذا كان الموت خيرا لي

سيارة تكريم الإنسان هي سيارة نقل الموتى

لكن سيارات نقل الأحياء فهي سيارات إهانة الإنسان


ياللا يا جماعة مين عايز يتكرم ؟؟

ايه اللي أنا باكتبه ده ؟؟