morsi6670

انتوا عارفين انا شايف حالنا و حال مصر و حال المصريين كلهم دلوقت شبه إيه شبه التلاتة من بني اسرائيل اللي حكى عنهم الرسول صلى الله عليه و على آله و صحبه و سلم الثلاث رجاله اللي دخلوا مغارة يستخبوا فيها من المطر و وقعت صخرة من الجبل سدت عليهم باب المغارة عملوا إيه ساعتها وهم جوه المغارة المضلمة قعدوا يتكلموا ؟ قعدوا يتخانقوا ؟ قعدوا يناقشوا الأسباب المنطقية و العقلانية التي أدت بهم إلى الدخول في هذه المغارة المظلمة ، مما استتبع نزول حجر كبير من الجبل سد باب الكهف عليهم ، مع دراسة الخطة المستقبلية لإمكانية الخروج من المغارة و دراسة المنظومة اللانهائية و الفكر الدراماتيكي البرجوازي و الليبرالي الذي يتيح الاختيار بين البدائل المتاحة و لا قعدوا يشربوا شاي و معسل و يلعبوا طاولة و لا قعدوا يتفرجوا على هيفاء وهبي في الدش و يتحدوا الملل و لا قعدوا يتكلموا في قضية الشرق الأوسط الجديدة عصام الحضري و لا واحد فيهم قعد يهرج و يقول ياللا كلنا نقول افتح يا سمسم و لا واحد منهم قال للتاني انت اخوان و التاني قال له انت اللي يساري البعيد ما تتكلمش و التالت قال لهم يا مجرمين أنا ايه اللي جابني معاكم و انا حز...

خمس سنين خمس سنين ضرب خمس سنين فوضى خمس سنين بوظان خمس سنين دوشة خمس سنين ديمقراطية كنا في ابتدائي بيقولوا لنا إن الجزائر هي بلد المليون شهيد ده كان زمان يا معلم دلوقت العراق عملت سكور جديد حلو قوي يعجبك عدوا المليون بشوية و في خمس سنين بس إيه الحلاوة دي كان يوم اسود و منيل من خمس سنين يوم سقوط بغداد التتار الجداد دخلوا بغداد تاني ابن العلقمي بعث من جديد كنت يومها حاسس إن دي نهاية العالم ، و إن القيامة ها تقوم النهاردة و فات خمس سنين هما محتلين و آخر حلاوة و إحنا هنا واقفين في طابور العيش و بنضرب بعض و نقتل بعض كمان صحيح ... هي دي الفوضى الخلاقة و لا بلاش

طب هي عملت ايه لأ بجد و الله ... هي عملت ايه ياااااااااااااه انت بتستعبط يا جدع انت ... و لا انت باين عليك عبيط أصلاً انت ما تعرفش البت دي عملت ايه ما يغركش شكلها الطيب السهن ده دي مجرمة عريقة في الإجرام دي نهبت مليارات من فلوس البلد و سافرت على لندن دي اللي خرمت قعر العبارة و خلتها تغرق و تسببت في غرق ألف واحد دي حرقت غيطان كاملة كانت مزروعة قمح و خلتنا نحتاج نستورده دي ولعت في قطر الصعيد و قتلت عمداً 300 راجل و ست و طفل دي ... دي طلعت ترقص في قناة فضائية مش لابس حاجة دي بقى اللي سرقت الونش بتاع مترو الأنفاق دي بقى اللي لوثت ميه النيل و دلقت فيها حبوب الصراحة بتاعة فؤاد المهندس المهم م الآخر البت دي خطر على البلد و على المصريين و لازم نحمي الناس منها ياااااااااه ما كنتش أعرف البلاوي دي كلها و الله لأ ... بجد كتر خيرهم ... ليهم حق يحبسوها إيه ده ... خمستاشر يوم بس ؟؟؟ دي تستاهل إعدام أيوة كده خلي البلد تنضف من إسراء دي و أشكالها يع ... بت مجرمة و قليلة الأدب و أنا م البلد دىىىىىىىىىي

زمان و أنا صغير قوي كانت أمي الله يرحمها لازم تسمع الراديو الصبح و هي بتعمل أي حاجة في البيت و كان الراديو بتاعنا طبعاً راديو كهرباء لمبات ماركة مولارد ألماني صوته و لا أجدع ستيريو هاي فاي الايام دي ، و كنت باحب قوي أطفي نور الشقة كلها و أتفرج على نور الراديو و أنا قاعد جنبه ، يااااااااااا خبر ، و خصوصاً بقى يا محترم بعد الفطار في رمضان المهم نرجع لماما و الراديو ساعة الصبحية كانت لازم تسمع الأستاذة صفية المهندس و برنامج ربات البيوت و عيلة مرزوق أفندي طبعاً ، و كان بعدها على طول برنامج خمس دقايق اسمه إيييييييييييه كان اسمه حسب التسعيرة أيوة ... حسب التسعيرة واحد راجل صوته لذيذ مش فاكر إسمه للأسف بيقول لستات البيوت على تسعيرة الخضار و الفاكهة في اليوم ده و خلي بالك يا ست البيت إوعي الخضري يستغلك و لا يضحك عليكي و الغريبة إن الحكاية كلها أيامها كانت تفرق قرش و لا تعريفة مش عارف ايه اللي فكرني بالبرنامج ده يمكن عشان نزلت امبارح و لقيت كيلو القوطة بتلاتة جنيه و اشتريت برضه يمكن عشان ما بقتش تفرق معانا الحاجة كل يوم بتغلا و احنا آخر طناش و انسجام يمكن عشان شفت ست كبيرة عند الخضري عمالة تقو...

زمان في ابتدائي في دروس التاريخ كانوا بيقولوا لنا على المقاومة الشعبية في بورسعيد لقوات العدوان الثلاثي سنة ستة و خمسين ، إن ستات البيوت كانت بترمي الزيت المغلي على العساكر الانجليز و الفرنساوية يااااااااااه الزيت ... و المغلي كمان يا تري كيلو الزيت أيامها كان بكام و أنبوبة البوتاجاز .. و لا حتى لتر الجاز اللي كانوا بيولعوا بيه البوابير كان بكام و هل كانت الستات في البيوت بيغلوا الزيت و الميه مخصوص عشان يرموها ع العساكر الانجليز و لا كانوا أصلاً بيطبخوا و لا بيقلوا سمك - و البورسعيدية أساتذة سمك على فكرة - و بعد ما يخلصوا قلية يرموا الزيت ع العساكر - يعني زيت بالزفارة كمان و للدرجة دي روح المقاومة دخلت كل بيت ، حتى ستات البيوت اللي المفروض ما لهمش في السياسة و لا وجع القلب بيفكروا يعملوا أي حاجة المهم عشان ما نطلعش برة الموضوع كيلو الزيت ساعتها كان بكام ؟ و لو - لا قدر الله يعني لو العدوان الثلاثي ده حصل الايام دي يا ترى برضه ستات البيوت هايرموا الزيت المغلي على جنود الاحتلال و لا لسة ها يسخنوا ميه و يدلقوها عليهم أنا عارف ها يعملوا إيه هايقولوا يا رب إفرجها بقى يا رب اصلح الحال .. دا ...