رجل من مصر

عم محسن


كان بيشتغل ساعي عندنا في الشركة
كان عليه فنجان قهوة مالوش حل
كنت باطلب القهوة منه هو بس
إوعى الواد أحمد و لا عم سعيد يعمل لي القهوة
إعملها انت يا عم محسن
تسلم إيدك يا عم محسن


**********

عم محسن كان معاه ابتدائية
دخل الجيش سنة 1965 يعني قبل النكسة بسنتين


كان بيحكي لي كتير عن الحرب
عم محسن أسروه في سينا مع زمايل له من الكتيبة جنب العريش
زمايل كتير ماتوا قدام عينيه برصاص اليهود


عم محسن قعد حوالي سنتين في معسكر عتليت الشهير في تل أبيب
كان معاه ضباط وجنود مصريين كتير من ولاد بلدنا
شاف الموت بعينيه كل يوم من ولاد الكلب


كان بيقعد ساعات يكلمنا عبري و نضحك سوا
ماهو في معتقل عتليت لازم يخلوك تتكلم عبري


**********

عم محسن أفرجوا عنه بعد مبادرة روجرز أيام عبد الناصر
الصليب الأحمر سلمه لبلده في سنة 70
رجع لأهله و ناسه
رجع لحضن بلده و بلدنا ... مصر


عم محسن اشتغل في شركة السكر بعد ما رجع من الأسر
و معلومة صغننه كده ع الماشي
أسير الحرب ما ينفعش يرجع الجيش تاني
لأنه لو وقع في الأسر تاني لازم يعدموه بالرصاص


**********

لما قامت حرب 73 كان عم محسن فراش في شركة السكر
أول ما سمع خبر الحرب راح جري على قسم البوليس
أنا عايز أروح الجبهة
عايز آخد تار زمايلي اللي ماتوا قدامي من ولاد الكلب


يا عم محسن ما ينفعش
إنت أسير حرب
قال لهم أنا عايز أموت هناك
عيط لهم و زعق و صرخ و عمل مهرجان
أنا هاسافر السويس لوحدي
هاروح يعني هاروح


**********

كان بيحكي لي و عينيه مليانة دموع
كان نفسي أروح يا محمد
كان نفسي أموت هناك
منعوني إني أروح الجبهة
كان نفسي أروح أضرب ولاد الكلب


**********

عم محسن طلع ع المعاش
ربنا يديك الصحة يا عم محسن
ربنا ينولك الشهادة يا عم محسن


**********

دول رجالتك يا مصر
دول الرجالة اللي حاربو عشانك يا مصر
دول الرجالة اللي كانو عايزين يموتو فداكي يا مصر
دول رجالتك يا مصر يا بلدنا


أيوه هما دول
مش حد تاني

فتوى تحريم الفوانيس

بما إننا في عصر التحريم و التجريم ... و التخريم كمان

و بما إن الجمجمة اللي شايلها فوق رقبتي دي مليانة على آخرها
و بما إني كنت في يوم من الأيام سلفي متشدد و ملكي أكثر من الملك
و بما إننا في شهر شعبان و رمضان على الأبواب
و بما إن البنت هاجر بنتي عمالة تزن من أول رجب على فانوس رمضان

إليكم إخوة الإيمان و الإسلام سبعة أسباب لعدم جواز استعمال فانوس رمضان

أولاً
أن الفانوس يعتبر تبذير و إنفاق للمال في غير موضعه
و المبذرين إخوان الشياطين بنص القرآن الكريم
و أن الإنسان سوف يسأل يوم القيامة عن ماله من أين اكتسبه و فيم أنفقه
و يعتبر إضاعة للمال و هو ما نهينا عنه بأكثر من موضع و أكثر من نص
و بالطبع لا يخفى عليكم أن الفانوس يستلزم شراء بطاريات لتشغيل الفانوس
و هو في ذاته إضاعة يومية للمال في غير موضعه

ثانياً
أن الصحابة و التابعين و تابعي التابعين لم يصح عنهم اقتناء فوانيس لصغارهم
فهو مما استحدث من لعب و لهو صبياني لا أصل له
و نحن مأمورون باتباع السلف الصالح
و لن يصلح حال الأمة إلا باتباع ما كان عليه سلفنا

ثالثاً
أن معظم الفوانيس الحالية ليست فقط فوانيس ذات إضاءة
و لكنها فوانيس تبث الأغاني المحرمة
و لا يخفى عليكم أن الأغاني من مزامير الشيطان
لا سيما إن كانت مصاحبة بآلات الطرب و اللهو و الموسيقى

و بعضها عليه أغاني للثلاثي المرح و هن ثلاث بنات متبرجات
ويقولون في الأغنية
إفرحوا يا بنات ياللا و هيصوا
رمضان أهو نور فوانيسه
يا حلوة التين و القمر الدين

رابعاً
أن أول من استخدم الفوانيس هم الفاطميون الشيعة المارقين من الدين
و من تشبه بقوم فهو منهم و العياذ بالله

خامساً
أن كلمة وحوي يا وحوي ... إياحا
هي كلمات من اللغة القبطية
و بعض الروايات تقول أن أغنية وحوى يا وحوى إياحا ترجع إلى عصر الفراعنة بالتحديد إلى عهد أحمس
يقال ان ام احمس كان اسمها اياحا فلما انتصر احمس على الهكسوس وطردهم من مصر
خرج المصريين مهللين الى بيت ام احمس وهم يقولون وحوى ياوحوى اياحا
لتمجيد وتهنئة اياحا ام احمس
أي أنها غير إسلامية بالمرة

و كما قلنا سالفاً أن من تشبه بقوم فهو منهم
و الإنسان مؤاخذ قطعاً بما ينطق به لسانه

سادساً
الأولى أن نربي أبناءنا تربية إسلامية ليس بها مجال للهو و اللعب
و أن نربطهم بالشهر المبارك شهر رمضان بالعبادة
فالأفضل أن يحضروا صلاة القيام و الدروس الدينية في المساجد
و أن نعلمهم الالتزام بقواعد الدين الصحيح و العقيدة السليمة

سابعاً
أن كل الفوانيس مستوردة من جمهورية الصين الشعبية الشيوعية الملحدة
و الحكومة الصينية تحارب الاسلام و المسلمين في تركستان الشرقية
و يجب علينا كمسلمين أن نقف مع إخواننا في الصين و نقاطع البضائع الصينية و على رأسها الفوانيس

**********

وبناء على كل ما سبق ذكره من حجج
فإن بائع الفوانيس آثم و ربحه من تجارة الفوانيس به شبهة التحريم
و كذلك المستورد للفوانيس من بلاد الكفر الملاحدة
و كذلك مخلص إجراءاتها في الجمرك
و ناقلها إلى مراكز البيع سواء بالجملة أو التجزئة

**********
ايه رأيكوا بقى يا أفندية
كده فل الفل
فتوى محترمة أهي
قبل ما حد في الفضائيات يسألها و يجاوبوا عليه
و لو عايزين آيات و أحاديث هاتلاقوا كتير

**********

مش قلت لكوا دماغي مليانة على آخرها

حد بقى يقنع هاجر بالكلام ده
أصل الفوانيس دلوقت بقت غالية أوي

لأ و ليه و سندويتش شاورمة و العوامة

أي ولد أو أي بنت

بيسمع كلام أبوه أو مامته

و لما ييجي يقول ليه

يقولوا له كده

أنا قلت كده

أنا عارف أكتر منك

إنت لسه صغير و انتي لسة مش عارفة الدنيا

طب نتنتاقش

أنا مش هاوجع دماغي معاك

أنا قلت كده و خلاص و عارف مصلحتك أكتر منك

كده بيتقلب الموضوع تحدي

ما أنا لازم أعرف ليه

طب مش هاعمل زي ما انتوا عايزين

يعني إيه بقى إن شاء الله

انت فاكر نفسك كبرت ولا إيه

مهما كبرت مش هاتكبر على أبوك و أمك يا قليل الأدب

و تبقى خناقة يا محترم

طب إفرض إنك انت أب فاضي و رايق كده و ليك كلام مع ولادك

مش زي معظم الآباء اللي ولادهم بيشوفوهم ساعة صلاة الجمعة و العيد و بس

و قعدت مع إبنك أو بنتك و عملتوا كبايتين شاي و هات يا كلام

هاتقول كل فكرتك عن الموضوع

ها تشرح كل رأيك

ها تتناقش مع إبنك أو بنتك

ها يسألك مليون سؤال

الموضوع ها يتشعب و ها تدخلوا في نقاشات جانبية كتير

إحتمال إبنك يقتنع بوجهة نظرك

و إحتمال لأ

حتى لو قال لك حاضر يا سي بابا

ها يبقى نفسه يعمل اللي قلت له عليه لأ

ها يبقى نفسه يجربه

نفسه يبقى له هو رأي و وجهة نظر في الموضوع ده بالذات

يبقى ليه هو خبرته الذاتية و العملية

مش مجرد كلام سمعه حتى لو من أكتر الناس حرصاً عليه

كتير أوي ممكن ابنك يقول لك حاضر

و يعمل اللي عايزه برضه

بس من غير ما يقول لك

عايز يعرف

يا ترى بابا فعلاً كلامه صح

يا ترى حكمه على الأشياء مظبوط

ولا ده مجرد كلام سمعه برضه من غيره و بيقوله بناء على رأي ناس تانية

ولا هو عشان بقى راجل كبير ها يخلينا إحنا كمان نعجز معاه

يوسف ابني نزل معايا دمياط في أجازة الصيف من سنتين

و نزلنا في فندق المنشي اللي تقريباً في وسط البلد

كنت باسيبه طول الليل و أروح أنا ميناء دمياط عشان الشغل

و كنت باسيب له فلوس عشان لو حب ينزل يتمشى أو يجيب حاجة

في يوم قبل ما أنزل قلت له أحسن مطعم في المنطقة هو المتبولي أو أبو خالد

بس لو رحت المتبولي بلاش تجيب شاورمة بالذات

لأن الشاورمة بتاعته مش حلوة و دايماً طعمها محروق

هاتلاقي زحمة على الشاورمة و ناس واقفة كتير

بس فعلاً الشاورمة بتاعته مش حلوة أبداً

المهم بعد شغل طول الليل

رجعت الصبح للفندق

لقيت يوسف بيقول لي فعلاً الشاورمة بتاعة المتبولي وحشة جداً

أول ما سمعته قال كده كنت هاموت من الضحك

أنا عارف إنه ها ينزل يشتري الشاورمة بالذات من عند المتبولي

و إلا ما يبقاش ابني

ابني ده بعد كده ها يتخرج و يشتغل و يفتح بيت و يبقى أب

و بنتي ها تتخرج و تشتغل و تفتح بيت و تبقى أم

أنا ساعتها مش هابقى موجود

لازم هما يعرفوا يتعلموا و يحكموا على الدنيا بكل صغيرة و كبيرة

ابني لازم يعرف ينقي خضار و سمك و فاكهة صح

لازم يعرف ياكل إيه و ما ياكلش إيه

يعرف يصاحب مين و ما يصاحبش مين

يعرف يسمع إيه و يتفرج على إيه و يقرأ إيه

لازم يعرف يتعامل مع العفاريت الزرق اللي ماليين الدنيا

لازم يعرف كل حاجة بنفسه

لازم يملا بحر حياته نقطة نقطة

و ساعتها ها يبقى فيه عوام

و ها يبقى مش محتاج العوامة البلاستيك اللي بابا جايبها له

خيل و بغال و حمير

و الخيل و البغال و الحمير لتركبوها و زينة و يخلق مالا تعلمون

دي الدواب اللي ذكرها ربنا في القرآن عشان ابن آدم يركبها أو يمتلكها لمجرد الزينة


و زي ما فيه حصان بيجر عربية نزح مجاري و صرف صحي
فيه حصان تاني بيجر كارتة أو حنطور عشان الناس تتفسح
و حصان بيلعبوا بيه في ملاعب كرة البولو
و حصان بيدفعوا فيه ملايين لمجرد إنه يجري في سباق
و حصان بيدفعوا فيه ملايين أكتر عشان بس الناس تتفرج عليه
و تلاقي له شهادة ميلاد و شجرة عيلة كمان


و زي ما فيه بغال بتجر حجر معصرة في سرجة لغاية ما تطلع روحها
بغال تانية بتشيل أحمال تسافر بيها بلاد بعيدة
و بغال كانت بتجر مدافع في الجيش الأمريكي
و بغال بتجر عربيات فول و عربيات زبالة و عربيات فاكهة


و زي ما فيه حمار بيرعى في الغيط و عايش مأنتخ
حمار تاني أمه داعية عليه بيدبحوه
عشان يأكلوه للأسود في السيرك أو جنينة الحيوانات


المهم إن كلهم خيل
كلهم بغال
كلهم حمير

كلهم بأربع رجلين و ودان طويلة و ديل


الحمير و البغال صوتها اسمه نهيق
و الخيول صوتها اسمه صهيل


ماحدش سأل نفسه إيه رأي الحصان
تحب يا حصان أفندي تجر عربية و لا تلعب بولو و لا تجري في سبق
ماحدش خد رأي البغل أو الحمار قبل ما يربطه في عربية كارو و لا يركب على ضهره


حصان أو حمار بيجر عربية

ممكن يكون عليها طوب و دبش من هدم عمارة
ممكن يكون عليها عيال بتطبل و تهيص في العيد
ممكن يكون عليها قدرتين واحدة فول و التانية بليلة
ممكن يكون عليها بطيخ و خيار و كنتالوب

ياللا يا عم الحمار ورانا شغل
حاضر يا عم العربجي

***********************************************

الغريبة بقى
و لا مؤاخذة في اللفظ يعني

أنا شايف إن كلنا حمير مربوطين في عربية
لازم نكمل المشوار لآخره
لازم نعمل اللي عايزه العربجي
و لو ما عملناش ؟؟
مافيش غير الكرباج


الموظف
الطالب
المهندس
الطبيب
الأب رب الأسرة
الأم ست البيت
حتى رجل الأعمال


تصاعدياً كده من الغفير للوزير
كل الناس بقوا خيل و بغال و حمير


شي .... يمشي
يس .... يقف
و برضه مش عارف أكتب الكلمة اللي الخواجة كان عايز اسماعيل يس يكتبها له في الجواب

******************************************

طب الحمار ساعات ممكن يزرجن و يحرن و يرفض و يرفص
و خد لي بالك لو سمحت من النقطة اللي فوق الضاد و مش فوق الصاد
لكن ابن آدم اللي ربنا كرمه بالعقل ما يقدرش يرفض
ابن آدم ما يقدرش يزرجن و لا يحرن و لا يرفص
لازم يمشي زي ما الدنيا كلها عايزاه يمشي
كل الدنيا عربجيه .... مع إنه هو حصان واحد

***************************

و معلومة ع الماشي للي ما يعرفش
البغل هو حيوان ناتج من تزاوج حصان ذكر و حمارة أنثي
و مستحيل يحصل العكس
لأن الفرس لا يمكن تسمح للحمار إنه يتجوزها
و البغل حيوان عقيم تماماً
و مالوش أعضاء تناسليه أصلاً عشان يتزاوج


يعني حتى الفرس لا يمكن تخلي الحمار يتجوزها
يعني الفرسه ليها رأي و تقدر تقول أيوه أو لأ
و لا يمكن حد يقدر يخليها تعمل شئ هي مش عايزاه

شفتوا بقى إننا أقل من الدواب
و بنقول على نفسنا بني آدمين


إيه اللي أنا باكتبه ده ؟؟


حاااااااااااااااااااااااااااااا

رضا

فرق كبير بين الرضا و التسليم بالأمر الواقع

الرضا هو الاقتناع التام بشيء معين
إن ما يبقاش نفسك في حاجة تانية
و مش بتدور و لا عايز أصلاً تدور على حاجة تانية

يعني زي واحد كان جعان و أكل لغاية ما شبع
ولو حتى يكون أكل طعمية و عيش بلدي و جرجير
خلاص ما بيبقاش نفسه في أي أكل زيادة
و لا عايز ياكل و لا يقدر ياكل تاني
بطنه مليانة و عينه مليانة و مش عايز حاجة
و لو حتى جابوا له تورتة بلاك فورست من لابوار

ساعتها بعد الأكل بيقول الحمد لله بجد
الحمد لله طالعة من قلبه و مقتنع بيها تماما

يعني الرضا بيتحقق لما نوصل لأعلى مستوى في أي شئ
لكن المستوى الأقل مش بيحقق الرضا الحقيقي
و بتبقى دايما بتفكر في الأحسن أو الأعلى

يعني الرضا مش هو الموجود و خلاص
مهما كان قليل أو مش كويس
الرضا مش يعني الرضا بالقليل أو الكسور أو المهملات

***************************************************

لو عايزين تفهموها زي ما أنا فاهمها

اسمعوا النبي محمد عليه الصلاة و السلام و هو بيعلمنا نقول
رضيت بالله ربا و بالإسلام دينا و بمحمد نبياً و رسولاً
شوفوا معنى كلمة الرضا هنا يعني إيه

الله ربي
يعني مقتنع تماماً بالله سبحانه و تعالى كرب و إله
و مش بافكر أبداً إني أعبد رب تاني أحسن منه
و لا أقول ياريت ربي يكون كده
لأن مافيش أحسن من كده

الإسلام ديني
يعني مقتنع تماماً بالإسلام كدين
و مش بافكر أبداً في دين تاني أحسن منه
و لا أقول يا ريت الإسلام يكون كده
لأن مافيش أحسن من كده

محمد نبيي و رسولي
يعني مقتنع تماماً بمحمد نبي و رسول
و مش بافكر أبداً في نبي و لا رسول تاني أحسن منه
و باقول ياريت النبي محمد يكون كده
لأن مافيش أحسن من كده


و إقروا كلام الله و هو بيقول عن المؤمنين بعد ما دخلوا الجنة
رضي الله عنهم و رضوا عنه

يعني المؤمنين في الجنة ربنا راضي عنهم و مش مطلوب منهم شئ تاني
و هما كمان راضيين عن الله و مش طالبين شئ زيادة تاني
هو فيه حاجة تاني زيادة بعد دخول الجنة ؟؟

ده الرضا اللي أنا فاهمه
مش الموجود و خلاص
مهما كان قليل أو مش كويس

*************************************

و فيه كمان نقطة تانية

الرضا هو إنك ترضى بقضاء الله و قدره
انك ترضى باللي ما تقدرش تغيره أبداً
لكن لو حاجة تقدر تغيرها .. ده ما يبقاش رضا
ده يبقى تسليم أو استسلام

يعني ربنا خلقك ولد أو بنت
أبوك و أمك هما فلان و فلانة
انت مصري و اتولدت في مصر
انت مولود في الزمن ده – لا قبل كده و لا بعد كده
اتجوزت و ربنا رزقك بولد أو بنت أو حتى طفل مغولي
هنا لازم تقول أنا راضي
لأنك ما تقدرش تغير حاجة
ما تعرفش تغير حاجة
مستحيل أصلاً تغير أي حاجة من دول

*************************************

لكن التسليم بالأمر الواقع حاجة تانية

هو إن الواقع ممكن يتغير
لكن إنت مش قادر تغيره
أو مش عارف إزاي تغيره
أو حتى مش عايز تغيره
و حاطط لسانك في بقك و ساكت
بس نفسك كل حاجة تتغير

سلبية تامة يعني
عجز عن فعل أي شئ

مش قادر
أو مش عارف
أو مش عايز

و لو حد سألك أخبارك إيه يا كابتن
تقول له إيه بقي يا محترم ساعتها ؟؟
رضا ... الحمد لله

و تلاقي كلمة الحمد لله دي طالعة مدخنة من صدرك
و انت رافض كل الواقع اللي انت عايش فيه
و شكلك عايز تضرب اللي سألك السؤال الغبي ده
ما إنت شايف العيشة يا أعمى العين و القلب

ده بقى اللي بيقولوا عليه إن الواحد يرضى بقليله عشان يعيش
و احمد ربنا انك عايش على رأي سعد الصغير
إحنا أحسن من غيرنا يا عم الحاج

*************

ماهو لو واحد جاله مرض .. أي مرض لو حتى زكام
و عنده القدرة و معاه فلوس يتعالج و الدكتور في آخر الشارع
و ماراحش لأي دكتور و لا أخد أي علاج
يبقى كده و لا مؤاخذة ما ينفعش يقول رضا
انت اللي عملت في نفسك كده

لكن لو بعد ما لف على الدكاترة اللي قالوا له مافيش علاج
يبقى كده لازم يقول رضا
و أنا عملت اللي في مقدرتي
وما أقدرش أعمل حاجة تاني
و يقول دي إرادة ربنا
و ساعتها فعلا ما يبقاش عليه أي لوم


*************

لو واحد موظف حكومة و لا قطاع عام
و بياخد مرتب ما يقدرش يعيش قطة لمدة أسبوع
و قاعد على المكتب طول النهار مش بيعمل حاجة
ما ينفعش ساعتها يقول رضا
أكيد ها تلاقيه مش قادر – مش عارف – مش عايز

لكن لو قعد يدور و يسعى
و يقدم في كذا شركة و يدور على كذا سفرية
و يحاول يحسن مستواه بدراسة او دورات أو تدريب
و يلاقي أي حل للكابوس اللي هو فيه
و لقى برضه باب الرزق مش راضي يفتح
يبقى كده مش عليه أي لوم و يقدر يقول رضا
أنا راضي يارب

**************

حلو لغاية كده ؟؟
طب تعالوا نكبر الموضوع شويتين

***************

ليه سيدنا موسى ما قالش رضا
أدينا عايشين في مصر جنب النيل و الزرع
فرعون بيعذبنا أي نعم بس عايشين
حتى اللي بيتعذبوا دول يا إما تكفير ذنوب يا إما بياخدوا ثواب
و لو ماتوا من التعذيب ها يروحوا الجنة
حلو قوي كده .. عايزين ايه تاني
إيه لزومها البهدلة و نسيب بيوتنا و أرضنا
و نخلي فرعون يحطنا في دماغه كمان


ليه سيدنا المسيح ما قالش رضا
آدي احنا بنعبد ربنا بعيد عن بيلاطس و الرومان و اليهود
و ربنا على المفتري و ينتقم منهم أجمعين ... قادر على كل شئ
ليه يدخل الهيكل و يقلب الموائد و يهاجم الفريسيين و الكتبة
ما كان قال لهم كلمتين و نصحهم و خلاص
و يدعي للفريسيين و الكتبة دول ربنا يهديهم
و لا حتى يدعي عليهم ربنا ياخدهم


ليه النبي محمد صلى الله عليه و سلم و الصحابة ما قالوش رضا
ليه ما قالوش نستحمل عذاب الكفار في مكة و لو متنا هانروح الجنة
إيه اللي يخلينا نسيب بلدنا و نهاجر
ما احنا عايشين في بيوتنا و بين أهلنا و جنب الكعبة كمان
و بنعبد ربنا في السر لغاية ما الكفار دول يغوروا في داهية أو ربنا يهديهم
و زي المثل ما بيقول
اصبر على جار السوء .. يرحل أو تجيله داهية
مالناش دعوة بحاجة تانية بقى


أكيد هاتقولوا دول أنبياء و ده وحي من الله و لازم تنفيذه
طب و هو احنا بقى لازم نتغير بوحي من السما
ما ينفعش نغير نفسنا بنفسنا يعني ؟؟
و لا هما الأنبياء كانوا بيعلمونا نغير حالنا و نلاقي حلول لمشاكلنا
كانوا بيعلمونا طرق الحل المختلفة و طرق تغيير الواقع


طب تعالوا نبعد عن سير الأنبياء شوية


ليه واحد زي سليمان الحلبي ما قالش رضا
يا عم أنا راجل سوري جاي اتعلم في الأزهر
آخد الشهادة العالمية و أرجع بلدي عالم أزهري قد الدنيا
أنا إيه اللي يخليني أقتل كليبر و يقعدوني على الخازوق
و المصريين أصحاب البلد واقفين يتفرجوا زي العادة


ليه مصطفى كامل ما قالش رضا
و منهم لله اللي شنقوا الفلاحين في دنشواي
ناس مفترية ... و ربنا على المفتري
على العموم الفلاحين دول شهداء
و ربنا يستر علينا و على باقي الفلاحين


ليه سعد زغلول ما قالش رضا
آدي احنا بقى عندنا دستور محترم
و الوفد خد الحكومة
عايز إيه تاني بقى يا عم سعد


ليه طلعت حرب ما قالش رضا
أنا مالي يا عم و مال البنوك و الاقتصاد و القطن و السيما
خليني في حالي أربي عيالي بالقرشين اللي معايا


ليه جمال عبد الناصر ما قالش رضا
عملت لك ثورة يا عم و بقيت رئيس جمهورية
كده نايس آخر حاجة يا معلم
هو يعني لازم سد عالي و لا تأميم قناة و عدم انحياز
و تحرير الجزائر و اليمن و الدوشة دي كلها


ليه أم كلثوم ما قالتش رضا
أديني باروح موالد في المنصورة و وجه بحري
و بانام كل يوم متعشية أنا و أبويا و أمي و اخواتي


ليه السنباطي و لا محمد عبد الوهاب و لا القصبجي ما قالوش رضا
و إيه لزوم المقامات الجديدة و الصعبة و القصايد و البلاوي دي كلها
ماحنا شغالين حلو ع الأفراح و الليالي الملاح و خلاص


ليه واحد زي أحمد زويل ما قالش رضا
كان زمانه دلوقت نائب رئيس جامعة لشئون التعليم و الطلاب
و لا رائد عشيرة جوالة قد الدنيا في كلية العلوم
و ممكن كمان كانوا عملوه وزير
وزير الدولة لمكافحة الناموس .. و إيزالو للجميع

*******************************

طب هما ليه في بلاد بره مش بيقولوا رضا
ليه دايما بيدوروا على الأحسن لغاية ما يعملوه
و ليه قدامهم بدائل ممكن لو ده مش عاجبهم يعملوا التاني

ليه في اليابان ما قالوش رضا
طالعين مفيصين من الحرب و قنبلتين في هيروشيما و ناجازاكي
و كل يوم البلد فيها زلازل و تسونامي
و هي كلها عبارة عن جزيرة بترقص في وسط البحر
خلينا في حالنا يا عم نقعد نعيط على حالنا براحتنا
ياباني في غير ملكك

ليه الألمان ماقالوش رضا
برلين بقت فتافيت بعد الحرب
ناكل زباله بقى و نسيب الجثث تعفن في الشوارع
ألمانيا دي لا يمكن ترجع زي الأول أبداً
إنت بتحلم يا خال ؟؟

طب ليه حتى اليهود ما قالوش رضا
أدينا واكلين شاربين نايمين واخدين جنسيات العالم كله
و اقتصاد الكرة الأرضية كله في جيوبنا
إيه لزوم اننا نجمع بعض و نعمل دولة و وطن قومي لليهود
و نحارب و نعمل مؤتمرات من 100 سنة
و نخطط لأحفادنا و أحفاد أحفادنا

*******************

لو كل الناس من أيام آدم قالت رضا زي ما إحنا بنقولها
و لا كان حصل أي تقدم في أي حاجة في تاريخ البشرية

كان زماننا بنخبط الزلط في بعضه عشان نولع نار
و كان زماني دلوقت ماسك الرمح بتاعي و رايح أصطاد عشان أغدي العيال
و لا على الأقل مستني الفرخة تبيض عشان الواد ابني ينزل يحلق

فيه آية في القرآن لازم نقراها كويس و نفهمها
لأننا كده فعلاً ماشيين في سكة غلط

*******************

اللذين توفاهم الملائكة ظالمي أنفسهم قالوا فيم كنتم
قالوا كنا مستضعفين في الأرض
قالوا ألم تكن أرض الله واسعة فتهاجروا فيها

*******************

يعني حكاية هو إحنا فيه ايه في ايدينا نعمله دي مش تمام
إحنا مالنا يا عم أدينا عايشين و ربنا على المفتري
يا عم اربط الحمار مطرح ما يقول لك صاحبه
يا عم ارضى بقليلك عشان تعيش
انت ها تعمل لنا فيها عرابي و لا عبد الناصر ؟؟

*******************

هو فيه إيه ؟؟
ايه اللي أنا باكتبه ده ؟؟؟

لأ لأ أبداً مش قصدي حاجة خالص

كده رضا قوي يا سعادة البيه
لأ بلاش كده
طب النضارة لو سمحت
أي أي أي
رضااااااااااااااااااااااااااااا