طب و بعدين

حاجة غريبة قوي

للدرجة دي أنا صاحب أفكار قيمة و جديدة

و للدرجة دي الناس اللي على النت كانت مستنية واحد زي حالاتي يتكلم

الغريبة بقى إني مش شايف في نفسي اللي الناس بتقول عليه ده

يمكن زمان لما كنت صغير و لما كنت لسة في الجامعة كنت حاسس فعلا إني مختلف عن باقي الناس

لكن بعد ما اتجوزت و اشتغلت و خلفت - و بعد ما عاشرت ناس لا يمكن كنت أتصور إني في يوم الأيام أفكر حتى أسلم عليها - على فكرة أنا مش باعيب في حد - لكن تخيل نفسك كده في المدرسة أو في الكلية اللي فيها ألوف - ومع ذلك أصحابك فيها لا يمكن يزيدوا عن خمسة - أصابع اليد الواحدة زي ما بيقولوا - و لازم لازم تشعر إن فيه ناس تانية و برضه زمايلك في المدرسة أو في الكلية - و مالكش دعوة بيهم خالص ولا حتى بتسلم عليهم

تبص بقى بقدرة قادر تلاقي الناس الغريبة عنك دي بقى مقفول عليك و عليهم باب واحد في شركة - و لازم تفطروا سوا و لازم تتكلموا سوا و لازم تهزروا سوا و لازم يعرفوا كل حاجة عنك و عن بيتك ومراتك وعيالك و أبوك و أمك و إخواتك و معاك في جيبك كام - ورحت فين امبارح و ح تتغدى إيه النهاردة

شوف بقى كمان لو كان ما فيش حاجه خالص بتجمع بينك و بينهم - و انت نفسك بالنسبة لهم شاذ و عبيط و أفكارك غريبة

يعني تخيل إحساسك و انت بتسمع تشايكوفسكي و شوبان و بيتهوفن قاعد في وسط ناس بتسمع عماد بعرور - الحل الوحيد إنك تحط سماعات الهيدفون في ودانك و تقعد لوحدك - أو تسيب القعده خالص

بصراحة - كابوس عايش فيه من أول ما اتخرجت من الكلية لغاية دلوقت

طب وبعدين ،،،، دي حكاية تانية بقى