صيد الخاطر

إبن الجوزي ... عارفينه

هو الفقيه الحنبلي الحافظ المفسر الواعظ المؤرخ الأديب

من مؤلفاته كتاب اسمه صيد الخاطر - بيقول في مقدمة كتابه الشيق بالنص
لما كانت الخواطر تجول في تصفح أشياء تعرض لها ثم تعرض عنها فتذهب ، كان من أولى الأمور حفظ ما يخطر لكيلا ينسى‏ ، و قد قال عليه الصلاة والسلام‏:‏ قيدوا العلم بالكتابة‏ ، و كم قد خطر لي شيء فأتشاغل عن إثباته فيذهب فأتأسف عليه‏

يعني بالبلدي كده ساعات الواحد بيخطر على باله حاجة و يقعد يفكر فيها بتركيز شديد و يربط بعض الأفكار ببعضها و يقول ياسلام الفكرة دي هايلة و الحمد لله إني وصلت لها ، و بعدين هب ، يلاقي نفسه نسي الموضوع كله و يقول يا ريتني كتبته

ابن الجوزي بقى جاب ورق و قلم و فضل حاططهم في جيبه بعد كده ، كل ما يجيله خاطر في أي حاجة أو أي فكرة جديدة يقوم على طول صايدها .. كاتبها يعني

عشان كده حتلاقوا كتاب صيد الخاطر مش مصنف تصنيف محدد
يعني ما تقدرش تقول إنه كتاب في الحديث و لا كتاب تفسير و لا أدب و لا أي تصنيف تاني
هو بس ... خواطر ... جت على باله في لحظة ... قام قافشها ... و كاتبها

أنا بقى عن نفسي ، و أكيد كتير منكم حصلت له الحكاية دي ... فكرة تيجي على بالك و تطير
و باضرب دماغي ميت شاكوش عشان أفتكر أنا كنت بافكر في إيه ؟؟؟ .. دي كانت فكرة جميلة قوي .... اللهم صل على النبي ... يارب افتكرها

انما خلاص ...طارت يا حلو

الناس بقى اللي بيقروا مدونتي
و الناس الحلوة اللي بيقولولي إوعى تبطل كتابة ... لغاية دلوقت أنا سخصياً مش عارف ليه
و كمان عشان عيالي اللي في جامعة و ثانوي و إعدادي و اللي ما عرفوش يعني إيه تربية و لا تعليم و ثقافتهم بقت بس في الموبايلات و لعب الكمبيوتر أون لاين
و لأني مجرب الإحساس القاتل اللي ممكن يخليني سهران ليلة بحالها مش عارف أنام عشان أفتكر بس أنا كنت بافكر في إيه
و لأني حسيت و عرفت إن دماغي اللي كل الناس كانت بتقول عنها فاضية - طلعت مليانة - لأ ... و مليانة بلاوي كمان

عشان كده لقيت نفسي شايل ورقة و قلم و أنا ماشي في الشارع - و أنا قاعد في البيت - و أنا باتفرج على التليفزيون - و أنا باسمع الراديو - و أنا باكل - و أنا حتى قاعد قدام الكمبيوتر دلوقت

و لولا إني مش عارف آخد الورقة و القلم معايا في الأحلام و أنا نايم كنت أخدتهم ... ما انتوا أكيت جربتوا التجربة القاسية جداً إنك تصحى من النوم من حلم جميل و تخبط راسك في ملة السرير عشان تفتكر الحلم ... لا يمكن

المهم لميت في يوم واحد ... يوم واحد .... أفكار تعمل كتاب

و أفكار لذيذة و الله

حاجات تضحك ... و حاجات تبكي

المهم م الآخر .... أنا قررت أعمل دوشة

شوف بقى كام مليون خلية عصبية شغالة في مخي دلوقت و أنا قاعد قدام الكمبيوتر عشان أكتب البؤين دول

و شوف بقى لو كل خلية منهم قالت حرف واحد

يعني حاجة كدة زي انسيكلوبيديا بريتانيكا و لا مؤاخذة

أنا بقى قررت أزهق الناس كلها مني

لأني قررت أكتب عن أي حاجة

أكتب في كل حاجة

و يارب ما تزهقوا مني