حسب التسعيرة
زمان و أنا صغير قوي كانت أمي الله يرحمها لازم تسمع الراديو الصبح و هي بتعمل أي حاجة في البيت
و كان الراديو بتاعنا طبعاً راديو كهرباء لمبات ماركة مولارد ألماني صوته و لا أجدع ستيريو هاي فاي الايام دي ، و كنت باحب قوي أطفي نور الشقة كلها و أتفرج على نور الراديو و أنا قاعد جنبه ، يااااااااااا خبر ، و خصوصاً بقى يا محترم بعد الفطار في رمضان
المهم نرجع لماما و الراديو ساعة الصبحية
كانت لازم تسمع الأستاذة صفية المهندس و برنامج ربات البيوت و عيلة مرزوق أفندي طبعاً ، و كان بعدها على طول برنامج خمس دقايق اسمه إيييييييييييه
كان اسمه حسب التسعيرة
أيوة ... حسب التسعيرة
واحد راجل صوته لذيذ مش فاكر إسمه للأسف بيقول لستات البيوت على تسعيرة الخضار و الفاكهة في اليوم ده
و خلي بالك يا ست البيت
إوعي الخضري يستغلك و لا يضحك عليكي
و الغريبة إن الحكاية كلها أيامها كانت تفرق قرش و لا تعريفة
و الغريبة إن الحكاية كلها أيامها كانت تفرق قرش و لا تعريفة
مش عارف ايه اللي فكرني بالبرنامج ده
يمكن عشان نزلت امبارح و لقيت كيلو القوطة بتلاتة جنيه و اشتريت برضه
يمكن عشان ما بقتش تفرق معانا
الحاجة كل يوم بتغلا و احنا آخر طناش و انسجام
يمكن عشان شفت ست كبيرة عند الخضري عمالة تقول حسبنا الله و نعم الوكيل
يمكن عشان الأسعار بقت حسب المناطق و ع الكيف
يعني كيلو القوطة في الزمالك بسعر غير كيلو القوطة في بولاق و الفرق بينهم 100 متر
و لا حد فاهم حاجة في أي حاجة
حسب التسعيرة ؟؟؟
هع هع هع
قول للزمان ارجع يا زمان
فاكرة انا برضه برنامج الى ربات البيوت ياااااااااااه كانت ذكريات جميلة فعلا وايام اجمل بس مع الاسف ما بترجعش !!
ردحذفاللى بيروح ما بيرجعش واللى بييجى اسوأماللى راح
تحياتى