أنا ... عبيط

من كام سنة حصل بيني و بين المدير بتاعي في الشركة مشكلة جامده قوي

المهم زعقنا مع بعض و كنت هاضربه بجد

لأني اتخنقت من الغباوة و الهبل اللي مش لاقي لهم أي سبب و لا مناسبة
و الراجل صمم يوديني في داهية و يخسف بيا الأرض

المهم واحد صاحبي معايا في الشغل

واد عفريت ابن جنية

راح للمدير و أقنعه إني غير مسئول عن تصرفاتي

و إني معايا شهادة معتمده بأني أعامل معاملة الاطفال
و إن المدير لو حب يديني جزاء أو ينقلني ممكن قوي أقتله و لا اعمل فيه حاجة

و ساعتها مش هايبقى له ديه

ده مجنون يا ريس

الواد ابن اللذينة عمل كل الفيلم ده و أنا ما أعرفش

لأنه جاله أخبار إن محمد حسن ده ها يتفور عن قريب و بيوضبوا له مصيبة
مش بقول لكوا واد ابن جنية

الغريبة بقى ان الراجل المدير صدق و اقتنع و خاف على نفسه بجد
واتغيرت معاملته خالص 180 درجة

تعالى يا محمد يا حبيبي

من فضلك يا أستاذ محمد

لو سمحت يا استاذ محمد

هو فيه إيه ... هو إيه اللي حصل

و صاحبي ده بيتفرج على المدير و هو بيحايلني و يحترمني جداً و هو ميت من الضحك طبعاً

المهم لما الأمور استقرت و فكرة الجزاء دي اتلغت تماما

صاحبي ده قال لي على الفيلم اللي عمله

أنا يوميها كان ها يغمي عليا من الضحك

يابن اللذينة

يخرب بيتك

تطلعني مجنون

مش أحسن ما تتنقل و لا تترفد يا حمار

دول كانوا ها يودوك في داهية و أنا انقذتك

طب ياريت أنا أبقى مكانك

كنت عملت أحلى اشتغالات

المهم ان أنا بقى سقت فيها

و عملت فيها عبيط بجد

ماهو لازم اسبكها شوية

لأنه لو اتعرف إن دي حركة من صاحبي يبقى هانروح إحنا الاتنين في داهية

و الموضوع بقى انتشر

ده محمد حسن طلع عنده مرض نفسي و معاه شهادة معاملة أطفال
و الناس كلها في الشركة بقت تعمل لي ألف حساب

و يستغربوا قوي لما يلاقوني ماسك شغل و لا طالع مأمورية

أزاي محمد ده يمسكوه شغل و لا يطلعوه مأمورية و معاه كمان عهدة خمسين ألف جنيه

المهم بعد كااااام سنة

الناس عرفت إن ده كله كان اشتغالة من الواد عماد ابن الجنية

طب أنا ايه اللي فكرني بالحكاية دي دلوقت

اللي فكرني بيها أني لسة عبيط

من وجهة نظر الناس كلها أنا فعلا عبيط

زميلي في المكتب من كام يوم قال لي : و الله العظيم انت عبيط

ساعات بحس ان الناس عندها حق

إن أنا فعلاً عبيط

ماهو لما واحد يحط على موبايله موسيقى تشايكوفسكي و بيتهوفن و شتراوس

و يقعد في الشغل يسمع البلاوي دي في الهيدفون يبقى أكيد عبيط

لما واحد يصعب عليه الفرّاش و لا الساعي و يديله فلوس و هو محتاجها

و يقول له هات حاجة حلوة لعيالك و انت مروح يبقى أكيد عبيط

لما واحد يسيب المأموريات و هو محتاج لكل جنيه عشان ما يكدبش و لا ينافق يبقى أكيد عبيط

لما واحد عينيه تدمع من بكاء طفل صغير ما يعرفوش يبقى أكيد عبيط

لما واحد يفضل طول الليل قاعد على النت بيحاول يخفف على الناس همومها

و يرسم على وش الناس أي ابتسامة يبقى أكيد عبيط

لما واحد يبقى عنده خمسين سنة و معظم اصحابه اللي على النت عندهم عشرين سنة يبقى أكيد عبيط

لما واحد يقعد مع عياله طول الليل يهرج و يقول نكت و يحكي في أي حاجة

و صوت الضحك يبقى جايب لآخر الشارع يبقى أكيد عبيط

لما واحد يتفرج على فيلم حين ميسرة

و يلاقي نفسه بيعيط على حال الناس الغلابة يبقى أكيد عبيط

لما واحد يقفلوا له بروفايل على اليوتيوب يقوم يعمل بروفايل تاني يبقى أكيد عبيط

لما واحد لسة بيحب اصحابة و زمايلة من أيام الجامعة ويسأل عليهم يبقى أكيد عبيط

لما واحد يقول أنا بحب مصر

و بحب كل ناسها و كل حتة فيها يبقى أكيد عبيط

و ستين عبيط

المشكلة بقى اني عاجبني اني أكون عبيط

و مش عارف ابقى مش عبيط

مش قلت لكم
أنا عبيط

أنا متأكد إن فيه عبط كتير قوي من عينتي دي

و بافكر أعمل لنا كلنا نقابة و لا حتى جروب ع الفيس بوك

مش قلت لكوا

أنا .... عبييييييط