رجل يطلب الخلع

رجل يطلب الخلع

عنوان غريب مش كده
طب الست بتطلب الخلع من الزوج لأنها ضعيفة و محترمة
الدين و المجتمع بيعتبرها تحت أمر جوزها و من حقه يعمل فيها اللي هو عايزه
من أول انواع الطبيخ اللي تعملها و ما تعملهاش
لغاية وقف حال البيت عشان الافندي ينام شوية الضهرية

بتوصل مرحلة الخنقة عند الست انها تبقى مستعدة تخرب بيتها بإيدها زي ما الناس كلها بتقول لها

بتبقى مستعدة تدفع فلوس و مصاريف محامي و قضية بس تخلص
بتبقى مستعدة تقف في وش كل اللي يعرفوها و تقول لهم ما تحاولوش تشيلواالفكرة من دماغي

يا بنتي اعقلي
بيتك
عيالك
خلاص بقى
طب هاتروحي فين
الناس هاتقول عليكي إيه
ايه العبط اللي انتي فيه ده
حد لاقي زوج و بيت
حد يرفص النعمة
و بعدين يا بنتي انتي بقالك سنين معاه
ايه اللي خلاكي تفكري الأفكار دي
انتي أكيد حد مقوي قلبك
انتي أكيد شايفة لك شوفة تانية
يا بنتي حرام عليكي
هاتخربي بيتك
و بعدين انتي كبرتي في السن
مين ها يرضى يبص لك تاني

طبعاً الكلام ده ملخص لمواويل و موشحات و أدوار بتسمعها أي ست بتفكر في الخلع

ممكن تراجع نفسها مرة و لا مرتين
ممكن تراجع نفسها مليون مرة
ممكن كلام الناس ليها اللي بينصحوها انها تشيل الفكرة دي من دماغها و تتهدي – ممكن كلامهم ده يفتح قدامها طاقات نور جديدة ما كانتش شايفاها و يخليها تعيد ترتيب أفكارها و يقنعها زيادة بالفكرة انها لازم تسيب جوزها

و الله لو ها تقعد في الشارع

الإحساس بالقهر فظيع
الإحساس بإن الإنسان يبقى ترس في آله و مالوش حق حتى يفكر
بإنه مش من حقه حتى يعبر عن أي رغبة أو طلب أو فكرة

إحساس الإنسان بإنه حمار بيجر عربية كارو
و كل الناس اللي يعرفهم قاعدين فوق العربية الكارو بيعملوا كل اللي هما عايزينه
بيطبلوا ويرقصوا و يصقفوا و لا حد فيهم فكر لحظة إيه شعور الحمار اللي بيجرنا ده
هو الحمار ده فرحان و مبسوط معانا
و لا تعبان و جعان و عايز ينام شوية
لأ و المصيبة كمان إن العربجي كل شوية يديله كرباج صغنون كده عشان يصحصح يجري

نرجع تاني لموضوعنا
الراجل لو حس بالقهر ده بيعمل حاجة صغيرة قوي
كلمتان خفيفتان على اللسان
لكنها أبغض الحلال ... بس حلال

تعالي يا اسمك ايه انتي ... أيوة انتي
بالسلامة
انت طالق ... شكراً

أو ممكن لو هو يعني الست دي غالية عليه قوي قوي
و لا حتى خايف و مرعوب منها و من عيلتها
يروح يتجوز في السر كده جواز عرفي و لا حتى رسمي
بس ماحدش يعرف عننا حاجة و النبي ياجماعة عشان المشاكل أبوس ايديكو
المهم انه يطلع همه في أي حاجة أو أي حد
و لو هو راجل شيطان ابن لذينة ما اترباش
ممكن يطلع عين أم اللي خلفوا مراته لغاية ما تقول حقي برقبتي
و ممكن توصل بيها الدرجة انها تقتله

طب أنا بقى راجل متجوز و مخلف الحمد لله
و مراتي كل الناس تشهد انها زي الملاك و أنا أولهم
و كمان أنا و هي بعد عشرة العمر بقينا حاجة واحدة
و ولادي الحمد لله بقوا رجاله ، وأزعم أنهم سعداء معايا و مع أمهم
يعني بكل المقاييس أنا عايش مستقر تماما من الناحية العائلية و الأسرية
و ربنا يبعد عنناعيون الحاسدين لأننا فعلا محسودين من كل اللي يعرفونا
و الحمد لله رب العالمين

أنا بقى طالب الخلع

لأ لأ استنوا ما تفهموش غلط

طالب الخلع من شركة القطاع العام اللي أنا شغال فيها
لأنها متحكمة فيا و في دماغي و في رزقي و في حياتي كلها
بقالي 19 سنة في الهم ده

هربت منها كذا مرة

سافرت
أخدت أجازة و اشتغلت في القطاع الخاص
أخدت أجازة تانية و فتحت مكتبة وقفت فيها سنتين
بس أنا مربوط بأستك زي اليويو في الشركة
بس خلاص ... مش قادر

نقول الكلام تاني اللي قلناه فوق
بس بصيغة المذكر و ليس المؤنث

يا بني اعقل
بيتك
عيالك
خلاص بقى
طب هاتروح فين
الناس هاتقول عليك إيه
ايه العبط اللي انتي فيه ده
حد لاقي وظيفة حكومية
حد يرفص النعمة
و بعدين يا بني انت بقالك سنين في الشركة
ايه اللي خلاك تفكر الأفكار دي
انت أكيد حد مقوي قلبك
انتي أكيد شايف لك شوفة تانية
يا بني حرام عليك
هاتخرب بيتك
و بعدين انت كبرت في السن
مين ها يرضى يبص لك و لا يشغلك عنده

و كمان بقى زودوا على الكلام ده البؤين بتوع الحكومة

حق عيالك في المعاش
المعاش كده ها ينقص
طب استنى لما تمسك وظيفة تانية و بعدين سيبها
انت راجل كبير و عاقل وبتفكر كويس

المهم إن الفكرة فعلا مسيطرةعلى مخي تماما
و هاطلب الخلع
قصدي هاسيب الشركة
قبل هي ما تطلقني
و الطلاق في الحالة دي هو الفصل
و ساعتها بقى بالعكس
ولا شركة ها ترضى تشغلني عندها

على فكرة

أنا سبق وقلت لكم هنا و في نفس المكان ده إني عبيط

ماحدش يقول لي نصايح
اللي بيحبني و عايز يخدمني بجد
يشوف لي عريس جديد .... قصدي يشوف لي باب رزق

هاطلب الخلع
هاسيب الشركة
و الله لو قعدت في الشارع
و رزقي و رزق عيالي على الله

و نعم بالله