النملة
و أنا قاعد قدام شاشة الكمبيوتر دلوقتو مركز قوي في مليون حاجة
في دماغي و على الكمبيوتر و على النت
لقيت نملة صغيرة قوي ماشية على سطح الشاشة
عادي
كنت هادوس عليها بطرف صباعي
و افركها بين صوابعي و ارميها في أي اتجاه
و اكمل اللي كنت باعمله
عادي
يادي النيلة
الطور قلع غماه
قلعت غماك بس ليه يا طور
بصيت بنظرة نانية خالص
كأني أول مرة أشوف نملة
مين دي
رايحة فين و جاية منين
و إيه اللي جابها هنا دلوقت
لو دست عليها بطرف صباعي
أكيد هاتموت
طب هاتموت زينا كده ؟؟
روح و هاتطلع من الجسد يعني ؟؟
يعني حياة كائن حي ها تنتهي ؟؟
طب هل لو ما رجعتش لمكانها كمان شوية
أهلها هايخرجوا يدوروا عليها
طب هايزعلوا عليها لما يشوفوا الجثة بتاعتها
و لا يمكن هايدعوا عليا
و يقولوا ليه الافترا بتاعك يا محمد يا حسن ده
كانت عملت لك إيه النملة الغلبانة دي بس
و لا هايقولوا نملة و راحت
عندنا ملايين تانيين
يمكن تمانين مليون نملة كمان
ساعات بسأل نفسي
هو النمل الصغير قوي ده مش مخلوق زينا
يعني ربنا خلقه و نفخ فيه روح
و عنده جهاز هضمي و عصبي و تناسلي و عيون و ايدين و رجلين
و بياكل و بيشرب و بيشتغل و بيتجوز و يخلف و بيكبر و يعجز ويموت
ممكن بيموت حتف انفه
بالشيخوخة يعني أو بالفشل الكلوي أو مضاعفات أكل السكر
أو ييجي واحد غلس زي حالاتي و يدوس عليه بكل بساطة بطرف صباعه
و تنتهي الحياة في لحظة
بدون أدنى تفكير من ابن آدم اللي أنهى حياة النملة دي
إيه ده
هي النملة راحت فين ؟؟
الله أعلم
الحمد لله ان أنا مش نملة
مع انهم بيقولوا الناس في بلدنا بقت زي النمل
إحنا في مصر بقينا زي النمل
يا ترى يقصدوا إيه
هل يقصدوا ان إحنا كتير قوي
أمال الصين و الهند يعملوا ايه
دول بقى اللي زي النمل بجد .... بس في نشاطهم
و لا يمكن يقصدوا ان إحنا صغيرين قوي و ماحدش شايفنا
ماحدش بيشوفنا و لا بيحس بينا إلا لما نتجمع مع بعض على بقايا أكل الناس التانية
أو ممكن يحس بينا لما نقرصه
و ساعتها بيبقى فيها موتنا
و لا يمكن يقصدوا إن أي حد أكبر مننا ممكن يدوس علينا و هو مش واخد باله
مش قلت لكم قبل كده
أنا عبيط
ما تاخدوش على كلامي
إنتي فين يا نملة
تعليقات
إرسال تعليق
محتوى رائع استمروا