منك لله يا مصر
احمد ابني قال لي : مش عارف ابقى زيك يا بابا
مش عارف أحب البلد دي زي ما أنت بتحبها كده
حاولت و ما عرفتش
و مش عارف انت بتحبها كده ليه
قلت له عادي
أنت لسه صغيرلسة ما شفتش حاجات كتير في مصر
لسة ما جربتش الغربة
قال لي : أنت عارف
لما قعدت في إسكندرية أسبوع مع أصحابي
وحشتوني جدا
وحشتني كل حتة في الشقة
حتى وحشتني دوشة هاجر
و حشتني القاهرة كلها
قلت له : أسبوع في إسكندرية ؟؟
لأ يا حلو
لما الطيارة تطلع بيك برة مصر
لما تنزل في مطار تاني خالص
في بلد تانية خالص
تقابل ناس تانية خالص
ممكن حب الاستطلاع و الزهق من مصر يخلوك فرحان شوية
بس هما شهر.. اتنين .. تلاتة بالكتير
و تلاقي نفسك تعبت
نفسك تنزل مصر و لو خميس و جمعة و ترجع للغربة تاني
و يبدأ بقى يا حلو العد التنازلي في حالتك النفسية
لغاية ما توصل لدرجة الصفر
نقطة الانطلاق
نقطة العودة
فيه ناس بتستحمل سنين
وناس ما تقدرش تستحمل شهور
حاجة غريبة فينا يا مصريين
بالرغم من ان كل واحد فينا في الغربة بيمثل قصة نجاح
إلا إننا كلنا بنبقى هانموت و نرجع مصر تاني
هاقول لكواعلى حاجة غريبة قوي
ليلة شفت تفاصيلها بعيوني
لما رجعت من السعودية انا و مراتي و ولادي
راجع مديون و متنيل بستين نيلة
و الدنيا في عيني زي خرم الإبرة
وكنت راجع بالطريق بري
يعني رحلة عذاب ما يعرفهاش إلا اللي جربها
ما يعرفهاش غير اللي اترمي طول النهار في العقبة
منتظر دوره في العبارة بتاعة نويبع
بعد ما ركبنا العبارة لقينا ناس معانا مترحلين لمصر لابسين كلابشات و عليهم حراسة
و قبل ماتتحرك العبارة من العقبة بدقيقة فكوا من ايديهم الكلابشات
العبارة كان عليها ألوف
كلنا مصريين
من كل دول الخليج
اللي جاي بعربيته اللي تعبان في تمنها
و اللي جاي بالاتوبيس
و اللي مترحل و عامل مصيبة في الغربة
اللي واخد كابينة
و اللي حاجر بولمان
و اللي حاجز سطح
تخيلوا بقى لما العبارة اتحركت إيه اللي حصل ؟؟
كل البشر دي طلعت فوق السطح
بصراحة كان فيه شوية هوا يردوا الروح
نسمة الصيف اللي وحشتنا
من غير أجهزة تكييف اللي عشنا فيها
حاجة تانية غير الصهد اللي كنا فيه
ترامس الشاي طلعت و الميه الساقعة
وتخيلوا إيه كمان
طبلة
مش عارف مين ابن العفريتة اللي كان معاه طبلة
هما عشر دقايق و الكل كان مصاحب بعضه
انت جايب عربية ماركتها ايه ؟؟
طب و دي جمركها ها يبقى كام ؟؟
و انت ولادك فين ؟؟
و انت يابني رحلوك ليه ؟؟
و انت هات تليفونك في مصر
و انت ساكن فين .. ياه دا حنا طلعنا جيران
و الكل بيسقف على الطبلة و يضحك من قلبه
ضحكة بقاله كتير ما ضحكهاش
و هو تعبان و عنده صداع و مش قادر حتى يقف
كلنا كنا مبسوطين
زي ما نكون رايحين رحلة للقناطر في النيل
بصوا بقى ع اللي حصل
أول ما أضواء المينا بتاعة نويبع ظهرت
زغايد من الستات
كل الناس بتحضن بعض
كل الناس بتقول هييييييه
كلنا بنغني سالمة يا سلامة
و أحلى كلمة حمد الله على السلامة سمعتها في حياتي
قالها لنا ظابط الجوازات و موظفين الجمرك
فيه ناس أول ما نزلت من العبارة سجدت على الأرض
و باست الأسفلت بتاع المينا
أنا ساعتها ما عملتهاش مش عارف ليه
بس دلوقت مستعد اعملها
منك لله با مصر
ها تموتينا في حبك
وقف يا وابور أربط عندك
نزلني في البلد دي
بلا أميركا
بلا أوروبا
مافيشي أحسن من بلدي
دي المركب اللي بتجيب أحسن من اللي بتودي
يا اسطى بشندي
الله يرحمك يا سيد يا درويش
و منك لله يا مصر
والله ياعمو محمد اللى انت كاتبه دة هوة اللى فعلا الواحد حس بيه فى كل مرة كان بيرجع فيها مصر سواء بالطيارة او بالبر بس فعلا البر كان بيبقى صعب قوى علينا خصوصا وانا صغيرة ولما القعدة بتطول فى العقبة ومعاملة الاردنيين او السعوديين فى المنافذ البرية بتبقى غبية وفعلا بيبقى الواحد وهوة بعيد عن البلد هايموت ويرجع وبعد اول اسبوع يبتدى يزهق يبقى عاوز يرجع تانى البلد اللى عايش فيها ويبتدى هناك يحس بالغربة ويبقى عاوز يرجع مصر تانى بس عموما بلدنا احلى بلد فى الدنيا فيها حاجات وحشة كتير بس الحلو فيها اكتر مردوم تحت تراب وحاجات مش من اصول بلدنا حاجات استوردناها ويا رب نرجع زى زمان ايام اجدادنا ايام ما كانت البلد بجد جميلة وحلوة وناسها اجمل واجمل ومع ذلك بلدنا جميلة واحلى بلد فى الدنيا
ردحذفمنك لله يامرسي
ردحذف