نبتدي منين الحكاية

بعد ما قررت اقول لكم كل حاجة عني

عشان تعرفوا ايه حكاية الثور اللي قلع غماه و شاف اللي حواليه

و بما إن انتوا اللي بتقولوا اني باكتب بأسلوب حلو

يبقى لازم أدوشكوا بقى شوية

أعتقد ان أي إنسان على وجه الأرض هو خليط من حاجات كتير

يعني مش حاجة واحدة مصمتة مكونة من عنصر واحد

بالضبط زي المبنى أو البيت متكون من وحدات مختلفة و متباينة في ذات الوقت

طوب و زلط و رمل و أسمنت و خشب و حديد تسليح

أسلاك و ابواب و شبابيك و كوالين و مفاتيح

و أكيد برضه ها تلاقي مواسير مياه نضيفة .. و مواسير صرف صحي كمان

المباني دي بقى هاتلاقيها مختلفة عن بعضها جدا
فيه مباني شاهقة ، وفيه مباني دور واحد أو أرضي

فيه مباني جميلة ، و فيه عشوائيات قبيحة
فيه مباني زي الهرم تقعد ألوف السنين

و مباني زي عمارة الحاجة كاملة اللي وقعت في الزلزال
فيه مباني بالرخام أو مدهونة زيت أو على المحارة أو على الطوب الأحمر

فيه مباني حلوة قوي من بره

و من جوه ضيقة و تقرف و تخنق

و تبقى عايز تخرج منها بأي طريقة و لو حتى نطيت من الشباك

و فيه مباني متواضعة قوي من الخارج

و من جوه جميلة و مريحة جداو تبقى مش عايز تخرج منها أبدا

ممكن تلاقي جناين و ممكن تلاقي مزابل

ممكن تلاقي قصور و ممكن تلاقي قبور

هاتلاقي بيت متكون من غرفة و لا اتنين

و بيت تاني فيه تلاتين غرفة

و ممكن تلاقي بيت جحا اللي مش هاتخرج منه

هتلاقي فتحات في الجدران كمان

شبابيك و بلكونات و مناور باردة

هاتلاقي مباني بحري و هواها يرد الروح

و مباني تانية قبلي و مافيهاش نسمة هوا

فيه مباني سهل أوي تلاقيها و عنوانها ما يتوهش

ومباني تانية تخليك تلف لغاية ما تتعب عشان تلاقيها

ويمكن كمان ترجع و ما تعرفش توصل لعنوانها

فيه بيت أول ما تدخله قلبك ينقبض

و بيت أول ما تدخله تشم ريحة حلوة

لأ .. و المباني كمان على أشكال كتير
تلاقي جوامع وكنائس

تلاقي مستشفيات

تلاقي كباريهات

و هاتلاقي برضه سجون

قلاع أسوارها عالية

و أكواخ و أكشاك

كل ده كوم و الأساسات بقى كوم تاني

فيه أساسات تستحمل زلازل لغاية تسعة ريختر و لا يجرالها أي حاجة

و فيه أساسات بتبقى تراب من هزة واحدة

أنا شايف كل البشر كده

أشكال و انواع و احجام

و في حياتي شفت كل الأنواع دي

أنا بقى العبد لله
شايف نفسي كل أنواع المباني دي

كل الهم ده جوايا

يعني مجمع مباني

مجمع سكني إداري تجاري

و فيه مول و جراج و روف جاردن كمان

ممكن تلاقي حتت مقرفة - و حتت حلوة قوي

حتة ضلمة و تخوف - و حتة منورة و جميلة
ممكن تلاقي حفر و خرابيش - على رأي إنسانة عزيزة

ممكن و العياذ بالله يقابلك وكر وطاويط و ممكن برضه تلاقي عش دبابير و عناكب

و أكيد ها تلاقي أعشاش يمام و عصافير كتير برضه

هاتلاقو جوايا ورد بلدي و قرنفل

و ريحان ريحته حلوة و طعمه مر

و صبار بلدي و افرنجي

الغريبة بقى في العك اللي جوايا ده كله

هو الأساس
أعتقد انه أساس متين و غارز في الأرض كويس قوي

الحمد لله أساس شاف هزات كتير

المبني اللي فوقه اتهد و اتبنى كذا مرة

و لسة زي ماهو

ده كل مدى بيعضم و ينشف زيادة

و يغرز في الأرض كمان

دلوقت لازم أتكلم الأول عن الأساس

عشان تعرفوا يا كل أصدقائي

اللي ربنا ابتلاهم بأنهم يعرفوني

مين الزفت اللي اسمه محمد حسن ده

يا ليلة بني

ايه اللي انا باكتبه ده ؟؟

أول حاجة لازم أقولها عن الأساس بتاع المبنى

المبنى اللي عمره خمسين سنة اللي هو أنا ده
هو إني اتكلم عن اهم حاجة فيه

ماما و بابا – الله يرحمهم

مش هاقول حكايات و لا أساطير

ولا إنهم كانوا بيعملوا كذا وكذا

لأ .. كانوا أب و أم عاديين جدا

لكن كل واحد فيهم عايز مقالة لوحده

كل واحد فيهم حكاية

هما اللي وضعوا الرسم الهندسي

حفروا الأرض و حطوا القواعد والعواميد

و أكيد طلعوا كذا دور

كان شغلهم نضيف قوي

كانوا صنايعية بجد

استلمت منهم المبنى زي الفل
قبل ما يبتدي العك و التبويظ و التشويه

هاقول كل حاجة

هاقول كل حاجة
اوعوا تزهقوا مني بس

انا جوايا كتير

الحمد لله

أخيرا هابتدي اتكلم بقى