أسئلة مش لاقي لها إجابة

لو انت عندك خادم أو ساعي أو موظف في شركتك

و طلبت منه يروح مشوار مهم في شغل معين

و قلت له يركب تاكسي رايح و تاكسي جاي

و إديته أجرة التاكسي ذهاب و عودة

نزل هو بسرعة و راح و رجع بالأتوبيس

و لا حتى راح و رجع جري على رجليه

المهم إنه أدى المهمة المطلوبة منه كما ينبغي عشرة على عشرة

هل يبقى من حقه باقي الفلوس اللي هي أجرة التاكسي

ماشي

هل من المفروض إنه يقول لك إنه راح و رجع بالأتوبيس

و يرجع لك باقي أجرة التاكسي اللي وفرها

و لا يضرب الباقي في جيبه

و يقول لك إنه راح بتاكسي و رجع بتاكسي

ماشي

انت بقى صاحب العمل أو المدير بتاعه

لو حبيت تبعت الموظف ده نفس المشوار تاني

هاتديله برضه تمن أجرة التاكسي

و لا هاتقول له ما انت رحت بالأتوبيس قبل كده

يبقى تاخد أجرة الأتوبيس بس

و يكون ده تمن إنه طلع صادق معاك يا حلو

ماشي

طب لو حبيت تبعت أي موظف أو عامل تاني في نفس المشوار

ها تديله برضه أجرة التاكسي رايح جاي

و لا تقول له زميلك قبل كده راح بالأتوبيس و لا على رجليه

يعني كده الموظف الأولاني قفلها على نفسه و قفلها على غيره

لأنه طلع معاك صادق يا معلمي

حلو قوي

طب لو المشوار ده ها يطول و لازم الموظف ده يتغدى

و سيادتك كصاحب العمل أو المدير بتاعه إديته تمن غداه

راح هو ضرب رغيفين فول محوج بالدقة و الطحينة تشبعه يومين

و رجع قال لك أنا اتغديت عند أبو شقرة و جاب لك فاتورة مضروبة

جميل جمال

طب لو انت بقى شخصيا مكان الموظف أو العامل ده

و صاحب العمل أو المدير مش مديني حقي

و ما أقدرش آخد تمن التعب اللي باتعبه غير بالطريقة دي

يبقى ده حلال إني أعمل الأفلام دي و لا حرام

فله قوي

طب لو كانت المأمورية إني أدفع الفلوس دي إكرامية لواحد

و الواحد ده ها يمشي لي شغل الشركة اللي أنا باشتغل فيها

يعني بالبلدي كده رشوة صغنونة أو سميها قهوة أو اصطباحة

و لو أنا قدرت أمشي الشغل عشرة على عشرة بكلامي و معارفي و بس

أو حتى دفعت نص مبلغ الإكرامية و النص التاني كلمتين حلوين

فهل باقي المبلغ يبقى من حقي

نايس جدا

طب لو واحد تاني من زمايلي طلع نفس المأمورية دي

و ماعرفش يقول البؤين بتوعي اللي باكل بيهم مخ الناس

و الموظفين مش بيحبوه و مش عايزين يمشوا له الشغل

يبقى لازم ها يدفع الأوبيك كامل طبعا

طب هو كده أحسن مني و لا أنا اللي أحسن

أي يا دماغي

طب لو رجعت على الحسابات و المراجعة في الشركة

أقول لهم إيه بقى و أكتب لهم إيه ؟؟

أقول صرفت عشرين و أنا صارف خمسة ؟؟

ما هو ممكن برضه المرة الجاية أصرف العشرين كلها بجد

ممكن ألاقي الموظف اللي باكل عليه عيش اتغير مثلا

أو ألاقي تفتيش و لا خنقة من أي نوع

عسل ع الآخر

طب لو الشركة قالت لي انزل في فندق أسبوع و هات لنا فاتورة

أي فندق يعجبك ... انت راجل محترم و بتمثل الشركة

ما دام بتعمل شغل الشركة زي الفل يبقى لازم ترتاح في الإقامة

فيه فنادق مكيفة و تلاجة و حمام و دش

و فيه فنادق اقفاص و سلالم و كنب استامبولي

و ممكن كمان تنام في الشارع

هل من حقك بقى إنك تجيب فاتورة مضروبة من فندق خمس نجوم و انت بايت في الشارع و تضرب المبلغ في جيبك قصاد تعبك و اللومباجو اللي جالك في ضهرك

طب هل لو المدير و لا صاحب العمل عرف اللي بتهببه ده كله

هايقول عليك راجل غلبان و عايز يجيب حاجة لنفسه و لا لعياله

و لا هايقول عليك حرامي و خائن للأمانة و كذاب

و لو كان المدير بتاعك نفسه و كل زمايلك بيعملوا كده

يبقى كده خلاص الموضوع مسموح بيه و حلال ؟؟

بس خلاص

خلصت الأسئلة

شفتوا سهلة إزاي ؟؟

أنا بقى باقوم و أنام و أنا مركب في دماغي خلاط الخرسانة ده

فكرت فعلا أروح لجنة الفتوى و لا دار الإفتاء و أسأل

بس مش عارف أصلا أسأل السؤال إزاي

أنا شخصيا لو كنت شيخ في مسجد و لا قسيس في كنيسة

و جا واحد سألني الأسئلة المكلكعة دي
دي مش عايزة كلام يا محترم – انت بتستعبط

مافيش عندي غير رد واحد

طبعا اللي بتهببه ده كذب و خيانة أمانة

و الآيات في القرآن الكريم و الكتاب المقدس متفقة على أن الصدق فضيلة و الكذب رذيلة

طب أتنيل على عين أهلي أعمل إيه ؟؟

عرفتوا ليه أنا عايز أسيب أم الشركة دي ؟؟

بس حتى لو سبتها

دي كل البلد ماشية كده

يا رب عفوك و رضاك

يا رب غفرانك

اللهم اكفني بحلالك عن حرامك

و أغنني بفضلك عمن سواك

إيه اللي أنا باكتبه ده ؟؟

معلش استحملوني