متحف النسيج المصري في شارع المعز

 أيه رأيكم فى خروجة حلوة بليل كدة  فى شارع المعز

طبعا كتير مننا يعرف شارع المعز لكن برضو كتير مننا ميعرفش حاجه عن متحف النسيج المصري

حاجة جديدة ومعظمنا مشفهاش قبل كدة وكمان بسعر رمزى 10 جنية للتذكرة وتخيل بقى أن المتحف ده مصنف الرابع عالميا على مستوى المتاحف اللى زيه ( يعنى أنت رايح تتفرج على كنز )

طيب أنتم هتلاقوا ايه فى المتحف ده ... المبنى عبارة عن دورين فيهم 250 قطعة نسيج و15 سجادة

هتلاقوا كسوة الكعبة المشرفة اللى كانت بتتصنع هنا فى مصر فى عهد الملك فاروق وكانت بتروح لحد السعوديه وكل دة هتعرفوا قصصه وحكاياته وانتم هناك .وكل قطعة في المتحف هتلاقوا مكتوب عليها قصة وحكاية وتسلسل التاريخ المصرى وتطور اللبس والشياكة بقى
 كل قطع النسيج اللى كانت متوزعة على كل متاحف مصر تم تجميعها فى المتحف ده واتسمى متحف النسيج ودى بصراحة فكرة ممتازة ..

وفى القسم الفرعونى وهو أكبر قسم هتشوفوا فيه كل حاجة حتى البامبرز كانوا بيستخدموه الامهات ازاى فى وقت الفراعنة وشنطة الغيارات وحاجات مهما حاولنا نشرحها عمر ما عقلك يتخيلها

طيب تعرفوا أن المبنى اللى هتخشوه فى المتحف ده هو أصلا أثر وأثر مهم جدا أسمه سبيل محمد على .. وكمان الموضوع مش مقتصر على قطع النسيج بس أنتم فى المتحف ده هتعرفوا الناس دى كانت بتنضف هدومها ازاى وايه المعدات اللى كانوا بيستخدموها

وازاى بعد السنين دى كلها لسه الألوان محافظة على زهوتها في المُجمل فهو متحف جميل جداً ويستحق الزيارة

تذكرة التصوير فى المتحف حتى لو بالموبايل ب 20 جنية

العنوان : 121 شارع المعز لدين الفاطمي  بمنطقة الحُسين – القاهرة

طب تروح ازاى لهناك ؟ نركب مترو وتنزل رمسيس أو العتبة ومن هناك عربية للحسين وتنزل الغورية وتعدى الشارع حتلاقى شارع المعز

سعر التذكرة : 10 جنيه والتصوير ب 20 جنيه