11 خطوه مهمه علشان تبدأ مشروعك الخاص والبيزنيس بتاعك وتنجح فيه

الشغل دلوقتي ما بقاش مقتصر على شغل الحكومه او الشغل الخاص لكن الشغل دلوقت بيعتمد على الابداع والابتكار والافكار الجديده فلازم عشان تنجح في شغلك تتعود دايما انك تفكر بره الصندوق علشان تحقق النجاح المادي او الوظيفي اللي انت بتحلم بيه

في زماننا ده الشغل في وظيفه حكوميه او في شركه خاصه بقى من الصعب الوصول ليه وحتى لو موجود فمش هيحققلك اي حاجه من طموحاتك واحلامك و طبعا احنا كشباب عندنا التزامات كثير واجبات اكثر عشان نقدر نقوم بها لازم ندور ونبحث لحد ما نلاقى الفرصه المناسبه اللي هتساعدنا نحقق الحلم ونوصل لتحقيق الذات وعشان كده لازم يكون عندنا خطه واضحه تساعدنا اننا نوصل لهدفنا وحلمنا ونجاحنا المادى والوظيفى

وانا هنا هاقول لك على خطه كانت سبب في نجاح ناس كثير وان شاء الله تكون سبب في نجاحك برضو والخطه دي عباره عن :

11 خطوه مهمه علشان تبدا مشروعك الخاص او البيزنس بتاعك وتنجح فيه :

الخطوه الاولى : اعصر دماغك :

ودي تعتبر اول طريقك علشان توصل ل فكره جديده ومميزه وده عشان العصف الذهني او انك تعصر دماغك من احسن الحاجات اللي هتساعدك فى انك توصل للفكره المناسبه ويا سلام بقى لو انت تعصر دماغك انت وناس تانيه معاك وتاخد كذا رأي

ده هيخليك كأنك بتفكر بكذا عقل و هيساعدك توصل لاحسن فكره بسبب الاقتراحات الكثير

الخطوه الثانيه : اعمل خطه لتنفيذ الفكره :

ودي للخطوه الثانيه اللي لازم تيجي بعد التفكير العميق او بعد عصر الدماغ عشان عصر الدماغ مش بس واقف على انك تجيب فكره لكن التفكير بعمق مهم جدا عشان تحط خطه كويسه وتشوف هتبدا ازاي وهتبدا منين وايه اللي هتحتاجه عشان تعرف تبدأ

الخطوه الثالثه : الماديات اللي هيه الفلوس :

لازم يكون عندك رؤيه واضحه في الامور الماديه و لازم تبقى عارف ومحدد ايه المتاح ليك وايه نسبة المخاطره وازاي تقدر تستغل ظروفك الماديه عشان تحقق اعلى ربح بأقل انفاق او اعلى الايرادات بأقل المصروفات و ده هيساعدك انك تقدر تلاقى مستثمرين خصوصا لما تبقى عارف خطتك كويس

الخطوه الرابعه : الامور القانونيه :

ودي خطوه مهمه جدا هتفيدك لما تحب تنفذ خطتك وفكرتك علشان تحمي نفسك ومشروعك من سرقه الفكره او من الفشل بسبب الامور القانونيه ودي حاجه لازم تعملها قبل ما تبدأ في التنفيذ عشان متعملش حاجه تعرضك للمسائله القانونيه وفي الخطوه دي انت ممكن تستعين ب محامي او حد يكون فاهم في الموضوع ده بحيث تتجنب الوقوع في مشكله قانونيه و تحمي نفسك وشغلك والبيزنس بتاعك

الخطوه الخامسه : التصاريح الحكوميه :

بعد ما تفهم ايه الامور القانونيه وايه اللي انت محتاجه بالضبط لازم تبدا في الحصول على التصاريح الحكوميه والترخيص ودي حاجه مهمه جدا وهتساعدك وتفيدك لو حبيت تكبر مشروعك ويكون ليك وجود على ارض الواقع وعلشان ما تحسش في اي وقت انك مهدد بالفشل انت اومشروعك او البزنس بتاعك

الخطوه السادسه : اختار الادوات المناسبه :

لازم تختار التقنيه او الطريقه المناسبه او الادوات اللى هتحتاجها علشان تبدا البيزنس بتاعك حتى لو الادوات دي بسيطه بس تحديدها واختيارها هيساعدك تبدا صح 

الخطوه السابعه : التأمين :

لازم تأمن على البيزنس بتاعك سواء كان اون لاين عن طريق النت او اوف لاين عن طريق محل تجاري بحيث انك تبقى واثق ان مجهودك و وقتك وفلوسك مش هتتسرق او مهدده بالفشل وده برضو هيساعدك تلاقي مستثمرين لمشروعك

الخطوه التامنه : اختار شريك :

لازم وانت بتختار شريك لشغلك او مشروعك تكون متاكد ان اهتماماته نفس اهتماماتك وتكون متوافق معاه في كل حاجه علشان تعرفوا تديروا المشروع سوا وتتجنب الوقوع في مشكلات الشراكة وده هيكون بتحديد مهام كل شخص فيكوا واختصاصاته والحاجات اللي هيقوم بيها

الخطوه التاسعه : اختار فريق عملك :

حاول دائما وانت بتختار فريق العمل انه يكون عنده وفاء واهتمام وشغف بمجال شغلك وعنده نفس اهدافك 

و هيفيدك جدا انك تشغل معاك حديثي التخرج ودا عشان هيكون ولائهم الاكبر ليك و عشان هتبقى مصاريف مرتباتهم اقل بكثير من الناس اللي عندها خبره ده غير الحماس الشديد اللي بيكون عند الشباب الخريجين وده هيفيدك جدا في شغلك

الخطوه العاشره : الاعلان او التسويق :

بعد ما حطيت خطه وفكره كويسه لازم تفكر في اعلان كويس سواء كنت بتقدم منتج او خدمه وده عن طريق انك تعرف مين هوه جمهورك المستهدف وازاي تتواصل معاهم بخطه تسويقيه ذكيه وممكن تستعين بخبراء تسويق يساعدوك على وضع خطه تسويقيه 

وحط في دماغك دائما خدمه او منتج من غير تسويق مهما كانت جودتها مش هتحقق لك النجاح اللي انت عايزه ولا العائد المادي المطلوب

الخطوه الحادية عشرة : طور نفسك :

ركز دائما على تنمية عملك وتطويره ودا هيكون بالاطلاع على كل جديد في مجال عملك ومتابعه كل جديد في المجال بتاعك وده هيساعدك انك تقدم خدمه او منتج مميز و هيخلي جمهورك المستهدف يتابعك دائما علشان يشوف كل جديد وما يحسش بالملل معاك

في النهايه :

 لازم تحط في دماغك ان النجاح سهل بس لازم تحط خطوات معينه تمشي عليها عشان تقدر تنجح

مفيش نجاح هيجيلك في يوم وليله

اقرا الخطوات دي كويس وامشي عليها ومبروك مقدما لنجاحك