الخلاط لسة بيلف
مليون فكرة في دماغي .. زي ما أنا حاسس دلوقت
أكتب عن إيه .. ولا عن إيه .. ولا عن إيه
أكتب عن أيام زمان و مصر اللي شفتها عروسة بتتمشى بفستان أبيض على الكورنيش
ولا أكتب عن أيام المدرسة في ابتدائي و إعدادي و ثانوي
ولا أكتب عن أيام الجامعة في كلية الطب البيطري ولا في كلية التجارة
أكتب عن حدائق القبة اللي كانت كل شوارعها فيللات و قصور و دلوقت بقت علب أسمنت
ولا أكتب عن العباسية اللي فيها قرايبي و مدرستي الثانوية
أكتب عن شغلي في حسابات النيابة العامة
ولا شغلي في السعودية
ولا شغلي في شركة السكر
أكتب عن شغلي في ميناء السويس و الأدبية
ولا أكتب عن شغلي في ميناء دمياط
ولا أكتب عن سفاجا و أبو طرطور
أكتب عن 28 سنة جواز و خمس عيال بقوا رجالة و عرايس
ولا أكتب عن طموحات كتير عدت و عدى زمانها و ماشفتهاش
أكتب عن الجيتار ولا العود
ولا أكتب عن تشايكوفسكي ولا بيتهوفن
أكتب عن أيام ما كنت سلفي وليا أصحاب في تنظيم الجهاد و الجماعة الاسلامية
ولا أكتب عن أيام ما كنت متصوف وقعدتي في الحضرة في السيدة زينب
أكتب عن أفلام يوسف شاهين
ولا أكتب عن أفلام عاطف الطيب و محمد خان
أكتب عن أفلام شفتها في السينما و أنا في أولى ابتدائي
ولا أكتب عن أفلام شفتها السنة دي
أكتب عن أول حب و أنا في ابتدائي
ولا أكتب عن آخر حب
شفتوا بقى إن دماغي فيها خلاط أسمنت
خلاط مليان رمل و زلط و أسمنت و جرادل ميه
و الحمد لله .. لسة الأسمنت ما نشفش
الحمد لله .. لسة بيلف
تعليقات
إرسال تعليق
محتوى رائع استمروا